Sam Fang
- Apr 4, 2023
- 3 min read

[#115 英倫患病有感 – 當屋企所有人都病你可以點做? 平時可以點keep? 養生篇]

呢排既流感真係好鬼恐佈，耳聽周圍既朋友都中哂招，本身以為自己可以幸免於難，因為始終work from home，非必要可以避開人群密集既地方，可惜是 “少年，你太年輕了”，而我發覺幾次都係咁，就係阿囡係學校度惹左菌返黎。

當然之後就全家中哂，差在發病時間唔同。係香港，通常一日大被蓋過頭，第二朝好返。係呢度，平均康復速度係4-5日，因為呢度既感冒藥實在太廢，好大程度靠你自身抵抗力，真係好鬼辛苦，仲要真係放低哂平時所有工作、心掛掛既野專心休息同埋食野先好得返，如果有咳就通常起碼兩星期時間康復，手尾長。

損失4-5日勞動力，仲要周身勁攰 (check過唔係covid)，真係可免則免，呢個亦係我想吐槽英國學校既原因，因為D小朋友真係好L污糟，我成日都會係阿囡放學幫佢消毒雙手，但講真其實小朋友本身乜都玩乜都試，始終偏向污糟，而今次篇文主要唔係想媽差個學校環境，或者媽差學校做乜有小朋友咳得咁犀利都仲比佢地返學既奇怪校規，其實比佢地在家休息先係理所當然，以免更多人患病，win win，可惜既係，就連大人咳都照返工既時候，你好難預期咳既小朋友佢會自己停返學休息好再返學，你只可以教小朋友唔好同病左既小朋友黏得咁近。

今次呢篇文想針對大家冬天想keep healthy可能忽略左既野。

1. 冬天成日覺得好凍唔飲水，但每日飲七杯水係超級無敵重要，除左吸收水分仲係排毒必須。最好當然分開飲，一次過飲係唔work，更加唔好臨訓前先飲咁多，一次過飲太多係會沖淡人體電解質。想易d入口，可以飲暖水，起碼唔使一飲覺得成身冰涼。

2. 每日都食到菜。

3. 每日食水果，尤其係蕉、蘋果或橙三寶，吸收所需維他命及排毒。

4. 唔鐘意食水果既，都係超市買鮮榨果汁，tropicana個d飲下，有益，唔係鮮榨唔建議飲。

5. 11-12點好去訓覺。訓7-8粒鐘好緊要，訓得少過既，信我，你有一日好似我咁要還，就係病左要連續訓返4-5日。 (我年紀三十中)

6. 每日慢跑10-15分鐘，或者sit up + push up 10-15 分鐘已經幫到你好多。重點係每日。

7. 有太陽即出去曬 (但冬天太陽少得可憐)

上面係好基本，偏偏好難做到，仲要日日都要咁做係有難度。我同好多香港人一樣，過左黎英國反而成日都好忙，乜都想整下搞下，我平均訓覺時間係2am (剪片寫野)，冬天飲少好多水同果汁，因為凍，運動都係做少左，因為凍。你地睇左自問已經日日都做到有幾難呀? 比個心心串下我。

8. 每個禮拜浸起碼兩次超熱熱水浴，幫助血液循環，人會精神d。信我，係要比多d錢水費同煤氣費，但對健康黎講，值得。一四、二五、三六悉隨專便。

9. 如果屋企有賢內助可以煲到湯既而佢又勤力既，恭喜你，無娶錯人，就算無都可以自己成為賢內助幫屋企人，每個禮拜煲一獲，一個月飲四獲，好過成個月無飲過。

10. 病毒初期有病徵即戴口罩，減低傳染。小朋友都戴會唔會太不近人情? 唔戴既話只能夠聽天由命，下一個中招一定係照顧者，即係你老婆或者你。建議配戴口罩直至康復，如果有咳。