一年容易又年尾，黎英國既第二年已經過左一半有多，好多煩心事如租樓 / 買樓 / 買砌傢俬 / 銀行 / 建立信貸都搞掂哂既時候，係英國既生活可以係平靜得黎有時都可以幾精彩。
[生活已上軌道]
我同太太都開始分別有自己既社交圈，隔離鄰舍都已打好關係定期來往吹水，工作已相對穩定，配合阿囡返學以及教佢學習既時間亦慢慢上左軌道，我地亦已安排興趣班比阿囡去玩下，希望佢搵到自己鐘意既野去玩，去學習多d。今年既生活都比較規律，於是乎安排左英國國內旅行以及一次亞洲之旅，睇返轉頭其實咁樣安排都幾好。
一方面繼續趁週末以及夏天探索英國 (雖然度度都差唔多)，一方面又可以返熟悉既亞洲玩下放鬆下。發覺其實夏天英國國內旅行都幾爽，配合正爆既天氣以及日照; 冬天返去熱既亞洲玩特別舒暢，因為返黎個下堅係冷得騰騰震 (-10度個幾日)。
黎緊2023年開始歐遊勇闖歐洲大陸更多地方，因為見到廉航機票無論去羅馬 / 巴黎 / 馬德里 / 歐洲主要城市都只係20-50鎊，堅係隨時出發都得，期待為大家帶黎更多既旅遊片 / 美食片係youtube channel同大家分享。
回顧四周比較熟既英國本地香港朋友，無論工作上或平時生活步伐都搵到佢地自己既節奏，有d去左歐洲兩三次以及亞洲兩三次 (講緊有小朋友既家庭) 喪玩，好鬼羨慕，證明大家都慢慢適應英國生活同調節自己，其實係一件幾開心既事。
[財務盈餘]
財務上由於已開始了解英國既稅制 / 銀行或broker既isa戶口 / 了解左英國幾時減價以及咩時候買野會有最好既選擇 以及 有乜野投資會令大家相對低風險地獲取較好既利潤 (早前曾分享定期 / 美國國債 / 企業債 / 外幣換匯 / buy to let 方法)，變相可以抵抗到通帳之餘，為自己財富慢慢增值。今年非常幸運有閒錢剩，係咁既環境無投資失利保住財富，相對好多人黎講已經係保住實力同子彈黎緊再出擊搵多d，十分感恩。
[心態轉變]
移英心態上都無當初咁chur咁急燥，特別係適應左英國人節奏之後，但香港人總會不停為自己增值，絲毫不停學習既機會，搞掂鎖事後已重新pick up 係香港個種學習態度，探索有價值既新事物。工作及生活上心態都輕鬆好多，亦因為咁做多左分享，等岩岩到埗既香港人了解多d，令佢地更易適應天氣、人際、英國處事方式及習慣。睇睇身邊group友既香港人，佢地都更加多地享受生活，特別係研究車既有多d空間同埋渠道去搞自己既愛車; 鐘意煮野食既簡直係發現寶庫，因為呢度食材包羅萬有、價錢相對相宜; 鐘意野外行山釣魚探索既都搵到佢地自己鐘意既地點; 佢地又周不時約埋一齊食野傾計分享唔同既心得，自己見到大家適應得咁好不由得心底感到開心。
作為香港人，so far寫左大概120篇文章，收到既反饋都非常正面，雖然偶爾會有藍絲惡言相向，但整體來說都十分多謝讀者既信任，小弟非常開心呢d親身經歷既故事幫到你，令到你行少d彎路適應得更好。
故事基本上已覆蓋移英初期需要settle down 既所有事項及心得分享，謹此多謝遇到既所有英國人、香港人以及不同國藉既同事以及朋友，堅係feel到個個都好有heart，大家互相交流鼎力相助。另一方面，筆者遇到既香港人朋友都非常好傾主動友善，希望呢種精神會繼續傳承落去，幫助到更多港人，唔會忘記當初為何過黎英國。
黎緊2023我會更深入分享係英國以及歐洲遇到既人事物，等大家深一層了解呢個地方既一切，亦會不時分享唔同既優惠同埋值得關注既事，希望惠及大家，當然唔少得以香港人身份繼續奮鬥!
祝願大家2023開心順境，平安、健康、快樂，世界和平!
***
Linktree: https://linktr.ee/ukmrpr
Youtube: https://youtube.com/@ukmrpr