係香港大家都識買六合彩，黎到呢度點都要識買euro millions。睇到呢度唔係鼓勵大家賭博，但係英國要買張彩票無理由唔識既。
最簡單係超市同收銀姐姐講想買張彩票玩euro millions，買一注其實都係2.5鎊就有交易。玩法係買5個號碼以及2個幸運號碼。5個號碼就1-50入面揀5個，而2個幸運號碼就1-12入面揀2個。星期二同星期五開彩，最多買7注。另外注意平日投注時間係朝早6點至晚上11點，攪珠日就要夜晚730前投注，英國時間晚上745就會攪珠。
---------------
咁點樣先叫中獎? 簡單d講其實就係咁既:
5個號碼 + 2個幸運號碼中哂 = 中jackpot 最大獎
5個號碼 + 1個幸運號碼 ＝ 13萬鎊左右
(中間有其他獎，詳細可以睇返中獎表如圖)
低至中2個主要號碼就會派彩2.5鎊 或 1個主要號碼＋2個幸運號碼就有4.3鎊。
--------------
派彩係現金形式，係英國係唔會抽稅。根據過往數據，最常抽出號碼係50,44,19,4,30、最常抽出幸運號碼係3同8。 (咁似香港既 “生” “發” “生” “發”既?!)
筆者早前上左groupon用優惠券1鎊價錢買左Lottogo 2 注euro millions既syndicate諗住睇下係點玩法試下，即係唔係成注買，係可以叫做買半注或一注既一部分，(當然如果中左，都會按比例分成)，另外佢仲有送所謂都幾容易上癮既刮刮卡遊戲，網上虛擬刮卡黎睇下有無三個圖案連成一線先會中獎。結果筆者中左，大拿拿一鎊，叫做成功取回注碼。
大家睇完個玩法係咪覺得同六合彩無乜分別? 早前有euro millions贏家羅左派彩後，兩公婆變得太有錢因 “了解＂而分開，又有因為突然中巨獎不停使錢無節制最尾要宣佈破產，筆者睇到呢ｄ新聞覺得好稀虛，但睇到另一d新聞又覺得好鼓舞，因為有贏家係做超多善事、又有另外一位贏家拯救左佢當地既球會既預算問題，球會仲幫佢立雕像；亦有一位贏家係抱持謙虛既心，繼續返平時返開既工，只不過佢話生活從此再無壓力，感覺非常踏實。
點都好，如果要玩既自己控制好注碼，亦都知道邊度可以參與呢d博彩遊戲。小賭有時可以怡情，大賭未必可以變誠哥。筆者睇新聞做善事既贏家都覺得可以擺脫財務枷鎖，心靈變得更富足，幫到人永遠係開心既。
點解揀而家同大家講? 因為今晚會有2千6百萬鎊既頭獎會揭曉，究竟花落誰家?!
***
Linktree: https://linktr.ee/ukmrpr
Youtube: https://youtube.com/@ukmrpr