電視劇爭產案睇得多，究竟會唔會發生係你身上? 幾年前小弟不幸目睹朋友屋企曾經爭過產，事緣朋友阿爺係一個富爸爸，叫做大概3000萬身家 (對我黎講已經好多)，但仔女(即朋友老豆)有成四至五個姐妹，生前無立遺囑，點知朋友阿爺患左甲狀腺癌，佢家人當時唔係太了解呢種病以為好快就會好返，跟住不幸既事係呢位阿爺係兩至三個月內過左身，留低物業、股票同大筆現金。
由於朋友家庭係傳統家庭，一向認為子承父業以及繼承一切遺產，本來無乜往來既另外幾位姐妹聽到呢位阿爺死左，就返黎同呢位朋友既老豆爭家產，因為根據香港法律，死者既遺產會分配比配偶及子女。
筆者目睹朋友係個兩三年係極速成熟、極速長大，因為佢daddy係唔識法律，於是乎佢要man up 幫佢老豆同家人四出搵律師，又要對個幾位姐妹周旋，可謂心力交瘁，仲記得佢當時十分徬徨成日搵我傾，後來知道事件亦令到呢家人同佢daddy既姐妹家庭之後再無任何聯繫，諗起都覺得好傷心，係名乎其實因為錢而被拆散既大家庭。
所以，生前分配好遺產係非常、非常、非常咁重要，重要既事講三次，避免子女因錢財反目成仇，有一個子女都好d，有幾個子女就更加要立，電視劇其實係人生寫照。筆者雖然唔係太老，但已經立哂遺囑，就係避免有任何爭拗，雖然筆者唔係話有太多錢。
好啦，咁英國遺產係點既呢? 其實同香港好似，因為香港個套都係抄英國。
1. 有遺囑: 係遺囑有效既情況下，根據遺囑黎處理死者生前所有遺產，包括物業、股票、債券、現金等。
2. 有遺囑，但只係部分有效。咁就會跟有效個part黎直接分配，另外個part跟下圖rules of intestacy分配。
3. 無遺囑: 遺囑無效或者無遺囑如果無爭議當然最好，跟下圖rules of intestacy去分配。但有爭議就要經法庭既遺產承辦，起碼搞3個月至6個月。
Rules of intestacy 個主要次序受益人其實係: 配偶 + 子女 > 父母 > 兄弟姐妹 > 祖父母 > 阿叔阿姨，無人無物遺產會比左政府。
-------------
正常黎講每個人都有 £325,000 的 nil rate band，如果遺產 net value 唔超過 £325,000，唔使交遺產稅。
如果遺產係物業，死者將物業留比子女，會有額外 £175,000 residence nil rate band，即係如果遺產唔超過 £500,000，唔使交遺產稅。
如果物業超過 200萬鎊，每多出 £2，個 residence nil rate band 就會減少 £1，即係如果物業價值超過 £2,350,000，個 residence nil rate band 就會用哂咁解。
如果遺產只係留比配偶，無論遺產有幾多，都唔會有遺產稅。
如果死者無用哂個額度 (nil rate band)，剩低既額度可以撥比配偶，變相配偶有£650,000既額度，第時配偶鄕左，遺產唔超過 £650,000就唔使交遺產稅。
英國境內外遺產: 如果係境內超過額度，就要交遺產稅。如果境外有遺產，又死者本身係定居英國既話，連海外遺產都需要交遺產稅，但就可以雙重稅務協議避免遺產被雙重徵稅。
--------------
筆者呢位朋友係超close既，當年真係體驗到佢既痛苦，一方面佢要幫佢老豆搞阿爺身後事已經好傷心，一方面又要好堅強幫佢老豆爭遺產，好多角力係度，過左足足7年先搞掂哂所有爭拗，聽到都覺得好攰。
前車可鑑，除左立遺囑，仲有另一個方法可以容易d處理，就係成立公司hold物業及其他資產，到退休就開始慢慢將股份轉比子女/你想遺產承繼既人，都係一個好方法避免爭拗。
-------
✓ 人生就係咁，處處有意外，意料之外。
✓ 立遺囑及開公司係好好pass down assets既方法。
✓ 和睦家庭好重要，起碼有咩事唔使爭拗，可以慢慢傾，傾唔掂再訴諸法律，好過一開始就爭拗。
✓ 立遺囑只需搵will writer，再加見證人就得，唔貴的，最平幾十鎊已做到。
✓ 香港立左中文遺囑既話建議係呢邊寫返份英文遺囑。
-------
***
請即支持英移公關Patreon 了解英國買屋橋妙!
加息週期英國做投資buy to let定國債定簡簡單單定期好?!
郵差叔叔送信純熟迅速送出! 做Royal Mail既日與夜! 同你終極全面披露郵差全面工作內容、面試秘笈、福利薪酬、行業寒暑及苦與樂!
睇左超過300間屋，英國買樓攻略第三集!