អតិថិជនត្រូវគោរពតាមលក្ខន្តិកៈ បទបញ្ជាផ្ទៃក្នុង និងសេចក្តីសម្រេចនានា របស់សាលាគ្រូយើង និងមិនមានសិទ្ធិលូកលាន់ការងារបច្ចេកទេស និងការគ្រប់គ្រងរបស់ស.គ.យឡើយ ប៉ុន្តែមានសិទ្ធិ ផ្តល់យោបល់ដើម្បីស្ថាបនា និងធ្វើឱ្យបានប្រសើឡើងនូវគុណភាពសេវាកម្មរបស់ ស.គ.យ។

មាតាបិតា និងអាណាព្យាបាលសិស្ស មានភារកិច្ចផ្តល់ព័ត៌មានអំពីកូនសិស្សដល់សាលា និងចូលរួមប្រជុំជាមួយសាលាតាមការអញ្ជើញ។ ការមិនចូលរួមប្រជុំតាមការ អញ្ជើញ្ញចំនួនបីដងក្នុងមួយឆ្នាំ សិស្សនឹងត្រូវបញ្ឈប់ពីការសិក្សាដោយស្វ័យប្រវត្តិ។ ចំពោះសិស្សអាយុក្រោម៧ឆ្នាំ មាតាបិតាត្រូវប្រាកដថា ពួកគេអាចបន្ទោរបង់ដោយខ្លួនឯងបាន ផ្ទុយទៅវិញ ក្នុងករណីបន្ទោរបង់ក្រៅបង្គន់ អាណាព្យាបាលសិស្សនោះនឹងត្រូវបង់ប្រាក់ចំនួនមួយម៉ឺនរៀលសម្រាប់ការបន្ទោរបង់ និងប្រាំពាន់រៀលសម្រាប់ការបត់ជើងតូចម្តង សម្រាប់ជូនក្រុមអនាម័យសាលាដែលធ្វើការសម្អាតសិស្ស និងកន្លែងបន្ទោរបង់នោះ។

ជាទូទៅអតិថិជនត្រូវបង់ប្រាក់សិក្សាទៅតាមការកំណត់របស់សាលា គឺយ៉ាងយូរត្រឹមសប្តាហ៍ទី១នៃត្រីមាសនីមួយៗ។ អតិថិជននឹងត្រូវបង់ប្រាក់ពិន័យ សម្រាប់ការយឺតយ៉ាវនៅក្នុងការបង់ប្រាក់ទៅតាមការកំណត់របស់សាលា។ រាល់ការបង់ប្រាក់នានា នឹងមិនត្រូវបានទូទាត់សងវិញទេ។ ការខកខានមិនបានបង់ប្រាក់ នឹងបណ្តាលឱ្យមានការបញ្ឈប់ការផ្តល់សេវាកម្មមួយរយៈរហូតដល់ប្រាក់ជំពាក់នោះបានសងគ្រប់ចំនួន។ រាល់ការឈប់សម្រាកប្រចាំឆ្នាំនានា រួមទាំងការឈប់សម្រាកវិស្សមកាលផង មិនត្រូវបានទូទាត់សងជាប្រាក់ដល់អតិថិជនវិញទេ។ អតិថិជនដែលនៅជំពាក់ប្រាក់មិនអាចអនុញ្ញាតឱ្យបន្តជាវសេវាកម្មរបស់ ស.គ.យ ជាថ្មីថែមទៀតទេ ដ៏រាបណាប្រាក់ដែលនៅជំពាក់នោះមិនទាន់សងអស់។ អតិថិជនត្រូវថែរក្សានូវរាល់បង្កាន់ដៃបង់ប្រាក់នានា ដើម្បីទុកជាភស្តុតាងសម្រាប់ការបង់ប្រាក់របស់ខ្លួន។ ស.គ.យ នឹងមិនទទួលខុសត្រូវលើការបង់ប្រាក់ណាដែលមិនមានលិខិតស្នាមច្បាស់លាស់ ដែលចេញដោយ ស.គ.យ នោះទេ។

សិស្សរបស់ ស.គ.យ ទាំងអស់ត្រូវគោរពតាមគោលការណ៍ និងសេចក្តីសម្រេចរបស់ក្រុម បច្ចេកទេសរបស់ ស.គ.យ ទាក់ទងនឹងការឡើងថ្នាក់ ត្រួតថ្នាក់ ប្តូរថ្នាក់ ឬត្រូវបញ្ឈប់ពីការសិក្សា ដើម្បីធានាបាននូវគុណភាព និងភាពយុត្តិធម៌។ រាល់ការឡើងថ្នាក់ ត្រួតថ្នាក់ ប្តូរថ្នាក់ ឬត្រូវបញ្ឈប់ពីការសិក្សា ត្រូវសម្រេចដោយក្រុមបច្ចេកទេស អ្នកគ្រប់គ្រងទូទៅ ឬនាយកសាលា ហើយដែលការនេះ ត្រូវធ្វើឡើងតាមក្បួនខ្នាតបច្ចេកទេស តាមស្តង់ដារត្រឹមត្រូវ និងដោយឯករាជ្យពីឥទ្ធិពលឬការជ្រៀតជ្រែកណាមួយពីអតិថិជន។

មានថ្ងៃឈប់សម្រាកចំនួនបីប្រភេទគឺ៖ សម្រាកវិស្សមកាល ការឈប់បុណ្យជាតិ-អន្តជាតិ និងការឈប់ដោយមានធុរៈចាំបាច់។ ការឈប់សម្រាកវិស្សមកាលតូចមានចំនួន១០ថ្ងៃ ដែលត្រូវប្រព្រឹត្តឡើងនៅកំឡុងពេលថ្ងៃបុណ្យចូលឆ្នាំថ្មីប្រពៃណីជាតិខ្មែរ ហើយវិស្សមកាលធំមានរយៈពេល២១ថ្ងៃ ដែលប្រព្រឹត្តទៅនៅចុងខែកញ្ញា។ ការឈប់សម្រាក បុណ្យជាតិ គឺត្រូវធ្វើឡើងតាមប្រកាសរបស់ក្រសួងការងារ ដែលចេញជារៀងរាល់ឆ្នាំ ។ដោយឡែកករណីសិស្សមានធុរៈចាំបាច់ ឬមានជំងឺដែលមិនអាចមករៀនបាន ឬក្នុងករណីមករៀនយឺតយ៉ាវ ត្រូវជូនដំណឹងមក ស.គ.យ។ ក្នុងករណីមិនបានជូនដំណឹង អតិថិជនត្រូវបង់ប្រាក់ពិន័យទៅតាមការកំណត់របស់ ស.គ.យ នៅរាល់ពេលដែលបុគ្គលិក ស.គ.យ ធ្វើការទូរស័ព្ទដើម្បីសាកសួរព័ត៌មានម្តងៗ។

ដើម្បីធានាបាននូវសុវត្ថិភាព សិស្សត្រូវមានអត្តសញ្ញាណប័ណ្ណដែលចេញដោយសាលា ហើយមាតាបិតាអាណាព្យាបាលសិស្សដែលជូន និងមកទទួលយកសិស្សទៅវិញក៏ត្រូវមានប័ណ្ណសម្គាល់ទទួលសិស្សដែរ។ សាលានឹងមិនប្រគល់សិស្សដល់អ្នកដែលមកទទួលដោយគ្មានប័ណ្ណនោះ ទេ។ ដូចនេះរាល់ការបាត់ប័ណ្ណសិស្ស និងប័ណ្ណទទួលសិស្សត្រូវជូនដំណឹងមកសាលាដើម្បីធ្វើប័ណ្ណថ្មី។ អតិថិជនត្រូវបង់ប្រាក់សម្រាប់ការធ្វើប័ណ្ណថ្មី ទៅតាមតម្លៃដែលបានកំណត់ដោយសាលា។

អតិថិជនដែលជាវសេវាដឹកជញ្ជូនរបស់ ស.គ.យ ត្រូវទទួលយកហានិភ័យ ដែលអាចបង្កឡើងដោយគ្រោះថ្នាក់ ដែលអាចកើតមានជាយថាហេតុចំពោះសិស្សដែលធ្វើដំណើរតាមរថយន្តរបស់ ស.គ.យ ។ ស.គ.យ នឹងទូទាត់សំណងត្រឹម ៥០% នៃការខូចខាតដល់អតិថិជន ដែលទទួលរងគ្រោះថ្នាក់នៅក្នុងករណីនេះ ប៉ុន្តែប្រាក់សំណងនោះទោះជាយ៉ាងណាក៏ដោយ ក៏មិនត្រូវលើសពីចំនួនប្រាំមួយលានរៀលឡើយសម្រាប់ជនរងគ្រោះម្នាក់ៗ។

អតិថិជនត្រូវទទួលយកហានិភ័យនៃគ្រោះថ្នាក់នានារបស់សិស្ស ដែលអាចកើតឡើងជាយថាហេតុ ដែលនៅក្នុងម៉ោងសិក្សារបស់សាលា និងនៅក្នុងបរិវេណស.គ.យ។ ក្នុងករណីនេះ ស.គ.យ នឹងទូទាត់សំណងត្រឹម ៥០% នៃការខូចខាតជាក់ស្តែងដល់អតិថិជន ប៉ុន្តែប្រាក់សំណងនោះ ទោះជាយ៉ាងណាក៏ដោយក៏មិនត្រូវលើសពីចំនួនប្រាំមួយលានរៀនឡើយសម្រាប់ជនរងគ្រោះម្នាក់ៗ។ ស.គ.យ មិនទទួលខុសត្រូវរាល់គ្រោះថ្នាក់របស់សិស្សដែលកើតមាននៅក្រៅបរិវេណ ស.គ.យ ឬនៅក្រៅម៉ោងសិក្សាឡើយ។

ស.គ.យ ត្រូវរៀបចំសាលារៀន និងទីកន្លែងរបស់ខ្លួនឱ្យមានបរិស្ថានល្អ អនាម័យខ្ពស់ប្រកបដោយផាសុខភាព។ សាលាក៏ត្រូវរៀបចំកម្មវិធីនានា នៅក្នុងកម្មវិធីរបស់ខ្លួនដើម្បីឱ្យសិស្សស្រលាញ់បរិស្ថាន និងមានអនាម័យល្អ។ ដូចនេះ សិស្សអាចត្រូវបានស្នើសុំឱ្យចូលរួមនៅក្នុងកម្មវិធីសម្អាត បរិស្ថាននានា ដើម្បីបង្វឹកពួកគេឱ្យមានទម្លាប់ល្អ និងចេះចូលរួមចំណែកខ្ពស់នៅក្នុងសង្គម។ មាតាបិតា ឬអាណាព្យាបាលសិស្សត្រូវទទួលយកកម្មវិធីនេះ និងជួយអប់រំកូនៗរបស់ខ្លួនបន្ថែមទៀតដើម្បីលើកកម្ពស់បរិស្ថានល្អនៅក្នុងប្រទេសរបស់យើង។

មាតាបិតា ឬអាណាព្យាបាលសិស្សត្រូវជួយបង្ហាត់បង្រៀនកូនរបស់ខ្លួនបន្ថែមទៀតនៅផ្ទះ និងបង្ករលក្ខណៈងាយស្រួលដល់ពួកគេឱ្យមានស្មារតី អារម្មណ៍ និងសុខភាពល្អ សម្រាប់ការរៀនសូត្រ ធំធាត់ និងលូតលាស់។ ក្រៅពីនេះ មាតាបិតា ឬអាណាព្យាបាលសិស្សត្រូវស្វែងរកពេលជួបប្រជុំពិភាក្សាជាមួយ ស.គ.យ ដើម្បីរកដំណោះស្រាយនានា សម្រាប់អនាគតល្អរបស់សិស្សក្នុងករណីចាំបាច់។ មាតាបិតា ឬអាណាព្យាបាលសិស្សត្រូវធានាថា កូនសិស្សនឹងបានមកប្រលងទាន់ពេលវេលា និងគ្រប់មុខវិជ្ជាតាមកាលវិភាគ និងការកំណត់របស់សាលា។ សិស្សដែលមិនបានមកប្រលង និងប្រលងធ្លាក់ ត្រូវធ្វើការប្រឡងឡើងវិញ ហើយត្រូវបង់ប្រាក់ពិន័យតាមការកំណត់។

សាលាមានសិទ្ធិថតរូបសកម្មភាពរបស់សិស្សសាលាគ្រូយើង នូវរាល់សកម្មភាពទាំងឡាយណាដែលទាក់ទងនឹងសាលា ទាំងនៅក្នុងសាលា ឬក្រៅសាលា និងប្រើប្រាស់ក្នុងករណីចាំបាច់ដល់សាលា ដោយមិនចាំបាច់ជូនដំណឹងជាមុនឡើយ។ ប្រសិនបើអតិថិជន មិនចង់អោយប្រើប្រាស់រូបរបស់កូនៗ ឬកុមារនៅក្នុងបន្ទុករបស់ខ្លួន ត្រូវជូនដំណឹងជាលាយលក្ខណ៍អក្សរមកសាលាជាមុន នៅពេលចុះឈ្មោះចូលរៀន។

រាល់ការកើតទុក្ខមិនសុខចិត្តនានា អតិថិជន និង ស.គ.យ ត្រូវជួបតទល់គ្នាដើម្បីដោះស្រាយទ្វេភាគី ជាមុនសិន មុននឹងស្វែងរកអន្តរការីមកជួយអន្តរាគមន៍។ ស.គ.យ បើក និងលើកទឹកចិត្តឱ្យអតិថិជន របស់ខ្លួនជជែកតវ៉ានូវរាល់បញ្ហាទាំងអស់ដែលខ្លួនពុំសុខចិត្ត ដើម្បីស្វែងរកដំណោះស្រាយល្អរួមគ្នា ឆ្ពោះទៅរកភាពយុត្តិធម៌ និងសន្តិភាព។