សេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ បានឱ្យដឹងថានៅថ្ងៃទី២០ ខែមិថុនា កម្ពុជា និងជប៉ុននឹងចុះហត្ថលេខាលើកិច្ចព្រមព្រៀងឥណទានដែលមានតម្លៃជិត១៨៨ លានដុល្លារសម្រាប់គម្រោងតភ្ជាប់ផ្លូវថ្នល់ និងការផ្គត់ផ្គង់ទឹក។
លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ និងឯកអគ្គរដ្ឋទូតជប៉ុនប្រចាំកម្ពុជា លោក UENO Atsushi នឹងចុះហត្ថលេខាលើលិខិតប្តូរសារ និងឯកសារពាក់ព័ន្ធផ្សេងទៀត។
ប្រភពដដែលបានបង្ហាញទៀតថា ឥណទានប្រាក់យេនដែលមានទឹកប្រាក់ចំនួន ២៣.៧ ពាន់លាន យេន (ប្រមាណ ១៧៣ លានដុល្លារ) នឹងត្រូវបានប្រើសម្រាប់អនុវត្តគម្រោងកែលម្អការតភ្ជាប់ផ្លូវជនបទ និងប្រមាណ២ ពាន់លានយ៉េនទៀត (ប្រហែល១៥ លានដុល្លារ) សម្រាប់ការអនុវត្តគម្រោងពង្រីកការផ្គត់ផ្គង់ទឹកស្អាតនៅខេត្តសៀមរាបដំណាក់កាលទី៣។
សេចក្តីប្រកាសព័ត៌មានបានបន្តទៀតថា«ការផ្តល់ជំនួយនេះបញ្ជាក់ពីការប្ដេជ្ញាចិត្តឥតងាករេរបស់ជប៉ុនក្នុងការគាំទ្រដល់ការខិតខំប្រឹងប្រែងជាបន្តបន្ទាប់របស់រដ្ឋាភិបាលកម្ពុជាដើម្បីជំរុញការអភិវឌ្ឍសេដ្ឋកិច្ចសង្គម។ ការគាំទ្រនេះក៏នឹងរួមចំណែកក្នុងការពង្រឹងទំនាក់ទំនងយូរអង្វែង និងកិច្ចសហប្រតិបត្តិការជិតស្និទ្ធរវាងប្រទេសទាំងពីរ ដែលថ្មីៗនេះបានតម្លើងទំនាក់ទំនងទ្វេភាគីទៅជា “ភាពជាដៃគូយុទ្ធសាស្ត្រគ្រប់ជ្រុងជ្រោយ” ខណៈពេលដែលប្រទេសទាំងពីរកំពុងរំលឹកខួបលើកទី៧០ នៃទំនាក់ទំនងការទូត។ AKP-C.Nika