លោកនាយករដ្ឋមន្ត្រី ហ៊ុន សែន កាលពីម្សិលមិញបានមានប្រសាសន៍ថា ក្រសួងមហាផ្ទៃ និងក្រសួងយុត្តិធម៌កំពុងធ្វើការលើវិសោធនកម្មរដ្ឋធម្មនុញ្ញ ដើម្បីរឹតបន្តឹងសិទ្ធិបោះឆ្នោត ដោយពង្រឹង និងលើកកម្ពស់ការទទួលខុសត្រូវរបស់មេដឹកនាំនយោបាយទាំងថ្នាក់ជាតិ និងថ្នាក់ក្រោមជាតិ។

ក្នុងឱកាសចុះសួរសុខទុក្ខកម្មករ-និយោជិតជិត ២ម៉ឺននាក់ នៅខណ្ឌពោធិ៍សែនជ័យ កាលពីថ្ងៃអង្គារ លោក ហ៊ុន សែន បានសង្កត់ធ្ងន់លើតម្រូវការកំណែទម្រង់សិទ្ធិឈរឈ្មោះបោះឆ្នោត ដោយអនុវត្តតាមការអនុវត្តរបស់ប្រទេសថៃ បន្ទាប់ពីមានការអំពាវនាវជាបន្តបន្ទាប់ពីគណបក្សប្រឆាំង ទៅកាន់ប្រជាពលរដ្ឋកុំឱ្យទៅបោះឆ្នោត នៅថ្ងៃទី២៣ ខែកក្កដា ឆ្នាំ២០២៣ ឬបំផ្លាញសន្លឹកឆ្នោត។

លោកបានពន្យល់ថា «​ប្រសិនបើ​ពួកគេ​មិន​ទៅ​បោះឆ្នោត​នៅ​ថ្ងៃទី​២៣ ខែកក្កដា ឆ្នាំ​២០២៣ នោះ ពួកគេ​ក៏​មិនអាច​ឈរឈ្មោះ​បោះឆ្នោត​បាន​ដែរ ទាំង​ការបោះឆ្នោត​ជ្រើសរើស​ក្រុមប្រឹក្សា​ឃុំ​សង្កាត់​ឆ្នាំ​២០២៧ ការបោះឆ្នោត​ក្រុមប្រឹក្សា​ខេត្ត​រាជធានី ក្រុង ស្រុក​ខណ្ឌ​ឆ្នាំ​២០២៤ ព្រមទាំងការបោះឆ្នោតព្រឹទ្ធសភានៅឆ្នាំ២០២៤ និងការបោះឆ្នោតសភានៅឆ្នាំ២០២៨។

លោកបន្ថែមថា វិសោធនកម្មរដ្ឋធម្មនុញ្ញត្រូវតែធ្វើមុនយុទ្ធនាការបោះឆ្នោតដែលគ្រោងធ្វើនៅដើមខែកក្កដា។

កាលពីយប់មិញនេះ តាមរយៈបណ្តាញ Telegram ផ្លូវការ លោកនាយករដ្ឋមន្ត្រីបានស្នើលោក ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ និងលោក កើត រិទ្ធ រដ្ឋមន្ត្រីក្រសួងយុត្តិធម៌ ឱ្យធ្វើវិសោធនកម្មរដ្ឋធម្មនុញ្ញជាបន្ទាន់។

លោកបានមានប្រសាសន៍ថា «រាជរដ្ឋាភិបាលបន្តគោរពសិទ្ធិប្រជាពលរដ្ឋ ទោះបីអាចឬមិនអាចចូលរួមបោះឆ្នោត នោះជាសិទ្ធិក្នុងការជ្រើសរើស ប៉ុន្តែវាចាំបាច់សម្រាប់រាជរដ្ឋាភិបាលក្នុងការពង្រឹង និងលើកកម្ពស់ ទំនួលខុសត្រូវរបស់ថ្នាក់ដឹកនាំទាំងថ្នាក់ជាតិ និងថ្នាក់ក្រោមជាតិ”។

លោកនាយករដ្ឋមន្ត្រីបានបញ្ជាក់ថា «អ្នកដែលចង់ឈរឈ្មោះឱ្យគេបោះឆ្នោតត្រូវតែមានទំនួលខុសត្រូវក្នុងនាមជាពលរដ្ឋល្អក្នុងសង្គមប្រជាធិបតេយ្យ ដោយចាប់ផ្តើមពីការអនុវត្តសិទ្ធិបោះឆ្នោតឱ្យជាប់លាប់។ ក្នុងន័យនេះ អ្នកដែលមិនទៅបោះឆ្នោតដោយគ្មានហេតុផលផ្លូវច្បាប់ត្រឹមត្រូវ នឹងត្រូវចាត់ទុកថាបាត់បង់សិទ្ធិឈរឈ្មោះឱ្យគេបោះឆ្នោត ប៉ុន្តែពួកគេនៅតែមានសិទ្ធិបោះឆ្នោតជាពលរដ្ឋដោយគ្មានផលប៉ះពាល់អ្វីឡើយ»។ AKP-ហេង បញ្ញា