რაგბის მსოფლიო თასის მეოთხედფინალური ეტაპის შეხვედრაში ინგლისის ნაკრებმა ფიჯი 30:24 დაამარცხა და ტურნირის მესამე ნახევარფინალისტი გახდა.

მატჩი ძალიან დაძაბული და საინტერესო გამოვიდა. ინგლისელებმა კარგად დაიწყეს და 14 წუთის შემდეგ 8:0 დაწინაურდნენ. ამის შემდეგ ფიჯიმ ერთი ჯარიმის გატანა მოახერხა, ხოლო ინგლისელებმა გარდასახული ლელოთი 12-ქულიანი უპირატესობა მოიპოვეს. 28-ე წუთზე თავისი ლელო ფიჯიმაც დადო, თუმცა ინგლისმა კიდევ ორი ჯარიმა გაიტანა და შესვენებაზე გუნდები ანგარიშით 21:10 გავიდნენ.

მეორე ტაიმში ევროპელებმა სხვაობა კიდევ უფრო გაზარდეს, თუმცა კუნძულელები არ გატყდნენ. 64-ე და 68-ე წუთებზე ფიჯიმ ორი ლელო დადო, ორივე გარდასახა და ანგარიში გაათანაბრა – 24:24.

გადამწყვეტი შეტევა ინგლისის ნაკრებმა 72-ე წუთზე განახორციელა, მეტოქის ჩათვლის მოედანს მიუახლოვდა და არეკნით ოუენ ფარელმა თავისი გუნდი 27:24 დააწინაურა. ფარელმა მატჩის ბოლოსაც მოახერხა ჯარიმის გატანა თავისი გუნდი ნახევარფინალში გაიყვანა.

2023 წლის მსოფლიო თასის ბოლო მეოთხედფინალში სამხრეთ აფრიკა საფრანგეთს დაუპირისპირდება. ამ მატჩში გამარჯვებული ნახევარფინალში ინგლისს შეხვდება.

ინგლისი – ფიჯი 30:24

ლელო: ტუილაგი, მარჩანტი, მატა, რავაი, ბოტიტუ.

გარდასახვა: ფარელი, ლომანი, კურუვოლი (2).

ჯარიმა:  ფარელი (5), ლომანი.

არეკნი: ფარელი.