គិតចាប់ពីដើមខែមករា រហូតដល់ដំណាច់ខែឧសភា ឆ្នាំ២០២៣ មន្ទីរពេទ្យគន្ធបុប្ឆា បានពិនិត្យព្យាបាលកុមារមានជំងឺធ្ងន់ជាង ៧ម៉ឺននាក់ ដែលបានអនុញ្ញាតឱ្យសម្រាកព្យាបាលក្នុងមន្ទីរពេទ្យ ដើម្បីតាមដានពិនិត្យសុខភាព និងព្យាបាលជំងឺឱ្យប្រសើរឡើង។
សាស្ដ្រាចារ្យ គី សន់ទី ប្រធានមន្ទីរពេទ្យគន្ធបុប្ផាភ្នំពេញ បានឱ្យដឹងថា ក្នុងរយៈពេល ៥ខែ ឆ្នាំ២០២៣ មន្ទីរពេទ្យគន្ធបុប្ផា មានកុមារឈឺចំនួន ៣២០,៩២១នាក់ ត្រូវបានពិនិត្យព្យាបាល នៅក្នុងផ្នែកពិគ្រោះជំងឺក្រៅ គឺបានកើន ៥២ភាគរយ បើធៀបកាលពីឆ្នាំ២០២២។
លោកបន្ថែថា ចំពោះកុមារមានជំងឺធ្ងន់មានចំនួន ៧៤,៩៧៥នាក់ ត្រូវបានដាក់ឱ្យសម្រាកព្យាបាលនៅក្នុងមន្ទីរពេទ្យ គឺបានកើន ១០៨ភាគរយ ច្រើនជាងកាលពីឆ្នាំ២០២២។
លោកបន្តថា យ៉ាងហោចមានកុមារចំនួន
៣៧៥នាក់ មានជំងឺគ្រុនឈាមធ្ងន់ធ្ងរ និងកុមារចំនួន ១០,៣៩១នាក់ ក្រុមគ្រូពេទ្យទទួលវះកាត់ផ្នែកទូទៅ។ លោកថ្លែងថា ចំពោះការវះកាត់
បេះដូង និងភ្ជិតប្រហោងបេះដូងតាមសរសៃ
ឈាម ទាំងនៅគន្ធបុប្ផាខេត្តសៀមរាប និងភ្នំពេញ គឺមានចំនួន ៣៦៧នាក់។
ចំពោះផ្នែកសម្ភពនៃមន្ទីរពេទ្យជ័យវរ្ម័ន
ទី៧ (គន្ធបុប្ផាទី៣) ស្រ្តីមានផ្ទៃពោះចំនួន ៤២,០៩៥
ករណី បានមកពិនិត្យតាមដានផ្ទៃពោះ និងព្យាបាល នៅក្នុងផ្នែកពិគ្រោះជំងឺក្រៅនៃមន្ទីរសម្ភព និងសម្រាលកូនបានចំនួន ៨,៣១៩នាក់ គឺកើន ៣៥ភាគរយ បើធៀបនឹងឆ្នាំ២០២២។
ករណីអត្រាមរណភាពកុមារក្នុងមន្ទីរពេទ្យ គឺមានត្រឹមតែ ០.៤ភាគរយប៉ុណ្ណោះ។ សម្រាប់ការចំណាយថវិកាក្នុងរយៈពេល៥ខែ នៃឆមាសទី១ ក្នុងឆ្នាំ២០២៣ គឺសរុបមានចំនួន
១៤,៣៤៨,៨៥៩ដុល្លារ។
ប្រធានមន្ទីរពេទ្យគន្ធបុប្ផាភ្នំពេញ បានថ្លែងថា៖ «តាងនាមខ្ញុំ ជាថ្នាក់ដឹកនាំ និងបុគ្គលិកមន្ត្រីរាជការ នៃមន្ទីរពេទ្យគន្ធបុប្ផាភ្នំពេញ និងមន្ទីរពេទ្យជ័យវរ័្មនទី៧ ខេត្តសៀមរាប ព្រមទាំងកូនចៅប្រជាពលរដ្ឋទាំងអស់ ដែលបានទទួលការថែទាំព្យាបាល សង្រ្គោះជីវិត នៅក្នុងមន្ទីរពេទ្យគន្ធបុប្ផា សូមថ្លែងអំណរគុណដល់សប្បុរសជនទាំងក្នុង និងក្រៅស្រុកទាំងអស់ ដែលតែងបរិច្ចាគថវិកាដល់មន្ទីរពេទ្យ ដើម្បីឱ្យដំណើរការប្រតិបត្តិការសង្គ្រោះ និងព្យាបាលកុមារប្រព្រឹត្តទៅ
ដោយរលូន និងមានសកម្មភាពជាប្រចាំ»។
លោកក៏បានអរគុណដល់កាកបាទក្រហមកម្ពុជា ដែលបានបន្តឧបត្ថម្ភថវិកាចំនួន ១លានដុល្លារ ជាលើកទី១២ កាលពីថ្ងៃទី១មិថុនា តាមរយៈមូលនិធិគន្ធបុប្ផាកម្ពុជា
លោក រស់ សីលវ៉ា នាយកប្រតិបត្តិមូលនិធិគន្ធបុប្ផាកម្ពុជា បានលើកឡើងថា រាល់ការលើកកម្ពស់សុខុមាលភាពកុមារ គឺមានសារៈសំខាន់ក្នុងការកសាងធនធានមនុស្សនៅកម្ពុជា ដើម្បីជាទំពាំងស្នងឫស្សីសម្រាប់ប្រទេសជាតិទាំងបច្ចុប្បន្ន និងអនាគត។
លោកបន្ថែមថា បច្ចុប្បន្ន បញ្ហាប្រឈមរបស់មន្ទីរពេទ្យគន្ធបុប្ផា គឺស្ត្រីសម្រាលកូននៅពុំទាន់មានគ្រែសម្រាកគ្រប់គ្រាន់ ហើយអត្រាមរណភាពទារកទើបកើតនៅមន្ទីរពេទ្យគន្ធបុប្ផាភ្នំពេញ នៅមានកម្រិតមួយដែលត្រូវយកចិត្តទុកដាក់បន្ថែម។
លោកថា៖ «បច្ចុប្បន្ន មន្ទីរពេទ្យក៏កំពុងសាងសង់អគារសម្ភពថ្មីមួយ ដែលមានគ្រែសម្រាកចំនួន ១២០គ្រែ (ក្នុងនោះ មានគ្រែសម្រាកព្យាបាលសង្គ្រោះទារកចំនួន ២០គ្រែ) នៅមន្ទីរពេទ្យជ័យវរ័្មនទី៧ ខេត្តសៀមរាប និងបានពង្រីកបន្ថែមលើការព្យាបាលជំងឺមហារីកផ្សេងៗលើកុមារ តាម
វិធីព្យាបាលដោយថ្មាំគីមីផងដែរ»។
កាលពីថ្ងៃព្រហស្បតិ៍ កាកបាទក្រហមកម្ពុជា បានបរិច្ចាគថវិកាចំនួន ១លានដុល្លារអាមេរិក ដល់មន្ទីរពេទ្យគន្ធបុប្ឆា ដើម្បីបន្តប្រតិបត្តិការពិនិត្យ ព្យាបាល និងសង្គ្រោះកុមារកម្ពុជា ដោយឥតគិតថ្លៃ។
កាលពីថ្ងៃទី២៩ ខែឧសភា ឆ្នាំ២០២៣ មូលនិធិគន្ធបុប្ឆាកម្ពុជា បានធ្វើយុទ្ធនាការ ១ម៉ឺនរៀល ១ម៉ឺននាក់ សម្រាប់កុមារកម្ពុជា ចាប់ពីថ្ងៃទី១មិថុនា ដល់ថ្ងៃទី៣០ ខែមិថុនា ឆ្នាំ២០២៣ ធ្វើឡើងតាមរយៈបណ្ដាញផ្សព្វផ្សាយនានារួមមានហ្វេសប៊ុក និងឆាណែលតេលេក្រាមផ្លូវការរបស់មូលនិធិ ធនាគារដៃគូ និងក្រុមហ៊ុនដៃគូសហការ ព្រមទាំងតាមរយៈបណ្ដាញសារព័ត៌មានផងដែរ។
គិតត្រឹមថ្ងៃទី១ ខែមិថុនា ឆ្នាំ២០២៣ មូលនិធិគន្ធបុប្ផាកម្ពុជា ទទួលថវិកាបរិច្ចាគចំនួនជាង
៥២ម៉ឺនដុល្លារអាមេរិក ពីយុទ្ធនាការ ១ម៉ឺនរៀល ១ម៉ឺននាក់ សម្រាប់កុមារកម្ពុជា។
របាយការណ៍របស់មន្ទីរពេទ្យគន្ធបុប្ឆា កាលពីឆ្នាំ២០២២ កុមារមានជំងឺចំនួន
៦៥៩ ៦០៨ករណី ត្រូវបានពិនិត្យព្យាបាលនៅក្នុងផ្នែកពិគ្រោះជំងឺក្រៅ និងកុមារមានជំងឺធ្ងន់ធ្ងរចំនួន ១១៩ ៩៥៨នាក់ បានដាក់ឱ្យសម្រាកព្យាបាលនៅក្នុងមន្ទីរពេទ្យ។
របាយការណ៍បន្ថែមថា កុមារមានជំងឺគ្រុនឈាមធ្ងន់ធ្ងរចំនួន ៤ ៦៨២នាក់ បានសម្រាកព្យាបាលនៅក្នុងមន្ទីរពេទ្យ និងកុមារចំនួន
២៦ ៦១៣នាក់ ត្រូវបានទទួលការវះកាត់ព្យាបាលនៅក្នុងមន្ទីរពេទ្យ។
ចំពោះកុមារចំនួន ១ ០៥៥នាក់ ត្រូវបានទទួលការវះកាត់បេះដូង និងភ្លិតប្រហោងបេះដូងតាមការឆ្លុះសរសៃឈាម។ ស្ត្រីមានផ្ទៃពោះចំនួន ៩១ ០១៥ករណី បានពិនិត្យតាមដានផ្ទៃពោះ និងព្យាបាល នៅក្នុងផ្នែកពិគ្រោះជំងឺក្រៅក្នុងមន្ទីរសម្ភពនៃមន្ទីរពេទ្យជ័យវរ្ម័នទី៧ និងស្ត្រីសម្រាលកូនមានចំនួន ២២ ៣០១នាក់៕