នៅក្នុងខេត្តកំពង់ធំ សហគមន៍កសិកម្មចំនួន ៤៦ បានចុះកិច្ចសន្យាផលិត និងផ្គត់ផ្គង់បន្លែ និងអង្ករប្រកបដោយគុណភាពដល់អ្នកទិញ និងរោងម៉ាស៊ីនកិនស្រូវរៀងៗខ្លួន។
លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានអញ្ជើញជាអធិបតីក្នុងពិធីចុះហត្ថលេខាលើកិច្ចសន្យាកាលពីថ្ងៃអង្គារ ដែលនឹងពង្រីក និងទ្រទ្រង់ទីផ្សារសម្រាប់អ្នកផលិតបន្លែ និងស្រូវ។
លោក ងួន រតនៈ អភិបាលខេត្តកំពង់ធំ និង បណ្ឌិត កៅ ថាច ប្រធានប្រតិបត្តិនៃធនាគារអភិវឌ្ឍន៍ជនបទនិងកសិកម្ម ក៏បានអញ្ជើញចូលរួមក្នុងពិធីនេះនៅក្នុងខេត្តផងដែរ។
លោក ឌិត ទីណា បានវាយតម្លៃខ្ពស់អំពីការផ្លាស់ប្តូរ និងបានលើកទឹកចិត្តសហគមន៍កសិកម្មឱ្យយកចិត្តទុកដាក់ជាពិសេសក្នុងការជ្រើសរើសគ្រាប់ពូជល្អបំផុតដែលមានតម្រូវការទីផ្សារខ្ពស់ និងដាំដុះដោយសរីរាង្គ។
លោកបានមានប្រសាសន៍ថា បន្លែនិងអង្ករមានគុណភាពនិងបែបសរីរាង្គ នឹងធានាបាននូវតម្លៃទីផ្សារខ្ពស់ទាំងទីផ្សារក្នុងស្រុកនិងការនាំចេញ ដោយលោកបន្ថែមថា វានឹងរួមចំណែកដល់សុខភាពអ្នកប្រើប្រាស់។
បើតាមលោករតនៈ ក្នុងចំណោមសហគមន៍កសិកម្មចំនួន ៤៦ ដែលចុះកិច្ចសន្យានោះ មាន ៤០ ជាអ្នកដាំស្រូវ និង ៦ ជាអ្នកដាំបន្លែលើផ្ទៃដីប្រមាណ ១ ម៉ឺនហិកតា។
ខេត្តកំពង់ធំ ដាំដុះស្រូវលើផ្ទៃដី ២៥៣.៣០០ ហិកតា ទទួលបានទិន្នផលជាមធ្យមប្រហែល ៤ តោនក្នុងមួយហិកតា។ AKP-លឹម ណារី