ការប្រយុទ្ធប្រឆាំងនឹងព័ត៌មានក្លែងក្លាយគឺជានិន្នាការសកលដែលរដ្ឋនានាជុំវិញពិភពលោកបាននិងកំពុងយកចិត្តទុកដាក់យ៉ាងខ្លាំង។
លោក ខៀវ កាញារីទ្ធ រដ្ឋមន្ត្រីក្រសួងព័ត៌មានកម្ពុជា បានថ្លែងក្នុងសិក្ខាសាលាស្ដីពីការប្រយុទ្ធប្រឆាំងព័ត៌មានក្លែងក្លាយសម្រាប់អ្នកសារព័ត៌មាន (វគ្គ ២) នៅក្រុងព្រះសីហនុ ខេត្តព្រះសីហនុ កាលពីម្សិលមិញ។
ក្នុងឱកាសនោះ មានការចូលរួមពីតំណាងស្ថានទូតបរទេសប្រចាំកម្ពុជា ប្រធានលេខាធិការដ្ឋានជាតិកម្ពុជាទទួលបន្ទុកកិច្ចសហប្រតិបត្តិការមេគង្គ-ឡានឆាង នៃក្រសួងការបរទេស និងសហប្រតិបត្តិការអន្តរជាតិ តំណាងរដ្ឋបាលខេត្តព្រះសីហនុ មន្ត្រីជាន់ខ្ពស់ក្រសួងព័ត៌មាន ប្រធានមន្ទីរព័ត៌មានក្រុង-ខេត្ត និងអ្នកសារព័ត៌មានជាតិ និងអន្តរជាតិ។
លោករដ្ឋមន្ត្រីក៏បានលើកឡើងពីយន្តការសកល និងថ្នាក់តំបន់ ព្រមទាំងយន្តការរបស់ប្រទេសកម្ពុជាក្នុងការប្រយុទ្ធប្រឆាំងនឹងព័ត៌មានក្លែងក្លាយ និងបានសង្កត់ធ្ងន់លើសារៈសំខាន់នៃការចូលរួមពីគ្រប់ភាគី រួមទាំងប្រជាពលរដ្ឋ ដើម្បីទប់ស្កាត់បញ្ហានេះប្រកបដោយប្រសិទ្ធភាព។
ចំណែកលោក ផុស សុវណ្ណ អគ្គនាយកព័ត៌មាន និងសោតទស្សន៍នៃក្រសួងព័ត៌មាន បានសង្កត់ធ្ងន់លើឥទ្ធិពលអវិជ្ជមាននៃព័ត៌មានក្លែងក្លាយមកលើសង្គម និងប្រទេសជាតិទាំងមូល។ វាអាចបង្កើតភាពចលាចលក្នុងសហគមន៍ និងសង្គមដោយការញុះញង់ឱ្យមានការរើសអើងពូជសាសន៍ ធ្វើឱ្យបាត់បង់ទំនុកចិត្តក្នុងស្ថាប័នសាធារណៈ ការលួចទិន្នន័យផ្ទាល់ខ្លួនរបស់មនុស្ស និងធ្វើឱ្យខូចសន្តិសុខ និងសណ្តាប់ធ្នាប់សាធារណៈ។ល។
លោកបន្ថែមថា ចាំបាច់ត្រូវមានរបាំងការពារព័ត៌មានក្លែងក្លាយ ដោយលោកបន្ថែមថា ឧបសគ្គទាំងនោះអាចជាក្រមសីលធម៌វិជ្ជាជីវៈក្នុងវិស័យសារព័ត៌មាន ឧបករណ៍ ឬបច្ចេកទេសផ្ទៀងផ្ទាត់ព័ត៌មាន វិធានការបទដ្ឋានគតិយុត្តិគ្រប់គ្រងបរិយាកាសប្រព័ន្ធផ្សព្វផ្សាយ ការចូលរួមចំណែកក្នុងការផ្សព្វផ្សាយព័ត៌មានពិត។ល។ AKP-C.Nika