ចង្រ្កង់ស្វា (Sunn Hemp) ជាប្រភេទដំណាំគម្របដីល្អបំផុតដែលជួយកែលម្អគុណភាព និងរក្សាជីវជាតិដី។
ក្នុងការចេញផ្សាយព័ត៌មាននាពេលថ្មីៗនេះ USAID មរតកបៃតង បានពន្យល់ថា ដំណាំគម្របដី គឺជារុក្ខជាតិដែលត្រូវបានដាំដុះដើម្បីផ្តល់ផលប្រយោជន៍ដល់ការរីកលូតលាស់ដល់ដំណាំផ្សេងទៀតនាពេលអនាគត ហើយអាចជាធាតុផ្សំដ៏សំខាន់នៃកសិកម្មសរីរាង្គ និងសត្វព្រៃ។
អង្គការនេះបានបន្តថា៖ «វាជួយជាមួយនឹងការច្រោះដី ការពារមិនអោយស្មៅដុះ គ្រប់គ្រងសត្វល្អិត និងជំងឺ បង្កើនជីវចម្រុះ និងអាចនាំមកនូវអត្ថប្រយោជន៍ជាច្រើនទៀតដល់កសិករ រួមទាំងការបង្កើនប្រាក់ចំណេញផងដែរ»។
USAID មរតកបៃតង តាមរយៈដៃគូរបស់ខ្លួនអង្គការសន្សំម្លប់ព្រៃ គាំទ្រកសិករមកពីសហគ្រាស IBIS Rice ឱ្យដាំដំណាំគម្របដីនៅក្នុងកសិដ្ឋានរបស់ពួកគេ ដើម្បីបង្កើនជីជាតិដីនៅក្នុងតំបន់គោលដៅ។ តាមរយៈការសាកល្បងដែលបានធ្វើឡើងអស់រយៈពេលជាច្រើនឆ្នាំដំណាំចង្រ្កង់ស្វាត្រូវបានគេកំណត់ថាជាប្រភេទដំណាំគម្របដីដ៏ល្អបំផុតដែលអាចសម្របតាមស្ថានភាពក្នុងតំបន់។
ប្រភពដដែលបាននិយាយថា កសិករបានទទួលការបណ្តុះបណ្តាលអំពីអត្ថប្រយោជន៍ និងវិធីដាំដុះដំណាំគម្របដីនេះនៅក្នុងកសិដ្ឋានរបស់ពួកគេ។ ជាមួយនឹងការបំពាក់ដោយបច្ចេកទេសនេះ កសិករមកពី IBIS Rice ទទួលបានបទពិសោធន៍ធ្វើឱ្យប្រសើរឡើងនូវជីជាតិដី កាត់បន្ថយស្មៅដុះនៅក្នុងវាលស្រែរបស់ពួកគេ និងធ្វើឱ្យផលិតកម្មស្រូវប្រសើរឡើង។
យោងតាមប្រភពអនឡាញ ចង្រ្កង់ស្វា (Crotalaria juncea) គឺជាប្រភេទរុក្ខជាតិត្រូពិច ដែលត្រូវបានប្រើប្រាស់ដើម្បីបង្កើនទិន្នផលដំណាំវិលជុំ និងកាត់បន្ថយសត្វល្អិត។ AKP-C.Nika