លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានមានប្រសាសន៍នៅថ្ងៃចន្ទនេះថា ជំនួយអភិវឌ្ឍន៍ និងការវិនិយោគផ្លូវការរបស់ប្រទេសចិនបានចូលរួមចំណែកយ៉ាងធំធេងដល់ការអភិវឌ្ឍន៍សេដ្ឋកិច្ចសង្គមនៅក្នុងប្រទេសកម្ពុជា។

លោកបានថ្លែងក្នុងពិធីសម្ពោធអគារតាំងបង្ហាញរបស់ក្រុមហ៊ុនផលិតរថយន្តចិន Great Wall Motor នៅទីក្រុងភ្នំពេញថា “ការអភិវឌ្ឍន៍របស់កម្ពុជាលើគ្រប់វិស័យគឺមិនអាចកាត់ផ្តាច់ចេញពីការគាំទ្រ និងការរួមចំណែករបស់ប្រទេសចិន”។

លោកបានបន្តថា ដោយសារកិច្ចសហប្រតិបត្តិការជិតស្និទ្ធរវាងប្រទេសទាំងពីរក្រោមគំនិតផ្តួចផ្តើមខ្សែក្រវ៉ាត់ និងផ្លូវ គម្រោងធំៗដែលវិនិយោគដោយចិនមួយចំនួនដូចជា រោងចក្រវារីអគ្គិសនី តំបន់សេដ្ឋកិច្ចពិសេសក្រុងព្រះសីហនុ ផ្លូវល្បឿនលឿនភ្នំពេញ-ព្រះសីហនុ និងអាកាសយានដ្ឋានអន្តរជាតិ សៀមរាប-អង្គរ ក្នុងចំណោមគម្រោងផ្សេងទៀត ត្រូវបានកំពុងអនុវត្តនៅក្នុងប្រទេសកម្ពុជា។

លោកបានបន្ថែមថា កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) និងកិច្ចព្រមព្រៀងពាណិជ្ជកម្មសេរីកម្ពុជា-ចិន ដែលកិច្ចព្រមព្រៀងទាំងពីរបានចូលជាធរមានកាលពីថ្ងៃទី១ ខែមករា ឆ្នាំ២០២២ បានជំរុញទំហំពាណិជ្ជកម្ម និងការវិនិយោគរវាងប្រទេសទាំងពីរ។

លោកបានលើកឡើងទៀតថា ក្របខណ្ឌកិច្ចសហប្រតិបត្តិការ “ត្បូងពេជ្រ” ដែលត្រូវបានបង្កើតឡើងដោយប្រទេសទាំងពីរនៅក្នុងខែកុម្ភៈ ក៏នឹងជំរុញការកសាងសហគមន៍ជោគវាសនារួមកម្ពុជា-ចិន។ សារព័ត៌មានស៊ីនហួ