កាលពីថ្ងៃពុធ កម្ពុជាបានបើកការដ្ឋានសាងសង់ផ្លូវល្បឿនលឿនទី២ដែលវិនិយោគដោយចិនតភ្ជាប់រាជធានីភ្នំពេញជាមួយក្រុងបាវិតក្នុងខេត្តស្វាយរៀង។
លោកនាយករដ្ឋមន្រ្តី ហ៊ុន សែន និងឯកអគ្គរដ្ឋទូតចិនប្រចាំកម្ពុជា លោក Wang Wentian បានអញ្ជើញជាអធិបតីក្នុងពិធីនេះ ដោយមានការចូលរួមពីប្រជាពលរដ្ឋប្រមាណ ៥,០០០នាក់។
វិនិយោគដោយសាជីវកម្មថ្នល់ និងស្ពានរបស់ក្រុមហ៊ុនចិនក្នុងចំនួនទឹកប្រាក់១.៣ ពាន់លានដុល្លារ គម្រោងផ្លូវល្បឿនលឿនដែលមានប្រវែង១៣៥.១ គីឡូម៉ែត្រ នឹងត្រូវបានអភិវឌ្ឍក្នុងទម្រង់ សាងសង់-ប្រតិបត្តិការ-ផ្ទេរ ជាមួយនឹងរយៈពេលប្រតិបត្តិការចំនួន៥០ឆ្នាំ។
គម្រោងផ្លូវល្បឿនលឿន៤គន្លងនេះត្រូវបានគេរំពឹងថានឹងបញ្ចប់ក្នុងរយៈពេល៤ឆ្នាំ។
ថ្លែងក្នុងពិធីនោះ លោកនាយករដ្ឋមន្រ្តី បានមានប្រសាសន៍ថា ផ្លូវល្បឿនលឿនដើរតួនាទីយ៉ាងសំខាន់ក្នុងការជំរុញកំណើនសេដ្ឋកិច្ច និងការអភិវឌ្ឍទេសចរណ៍ ដោយលោកបានថ្លែងអំណរគុណចំពោះប្រទេសចិន ដែលបានវិនិយោគលើផ្លូវល្បឿនលឿននៅកម្ពុជា។
លោកបានបន្តថា “ផ្លូវល្បឿនលឿនភ្នំពេញ-បាវិត គឺជាផ្លែផ្កាមួយទៀតនៃកិច្ចសហប្រតិបត្តិការរវាងកម្ពុជា និងចិន ក្រោមគំនិតផ្តួចផ្តើមខ្សែក្រវ៉ាត់ និងផ្លូវ”។ ផ្លូវល្បឿនលឿននេះនឹងជំរុញដល់កំណើននៃការវិនិយោគ ពាណិជ្ជកម្ម ទេសចរណ៍ និងការដឹកជញ្ជូនឆ្លងកាត់ព្រំដែនរវាងកម្ពុជា និងវៀតណាម។
ផ្លូវល្បឿនលឿនភ្នំពេញ-បាវិត ក៏នឹងក្លាយជាកត្តាជំរុញកំណើនសេដ្ឋកិច្ចសម្រាប់កម្ពុជាផងដែរ ដោយលោកបានបន្ថែមថា ការធ្វើដំណើរលើផ្លូវល្បឿនលឿន ចំណេញទាំងពេលវេលា និងថវិកា។
លោកឯកអគ្គរដ្ឋទូតចិនបាននិយាយថា ឆ្នាំ២០២៣ គឺជាខួបលើកទី៦៥នៃទំនាក់ទំនងការទូតរវាងប្រទេសចិន និងកម្ពុជា និងខួបលើកទី១០ នៃគំនិតផ្តួចផ្តើមខ្សែក្រវ៉ាត់ និងផ្លូវ។
លោកបានមានប្រសាសន៍ថា គម្រោងផ្លូវល្បឿនលឿនភ្នំពេញ-បាវិតនេះ មិនត្រឹមតែជានិមិត្តរូបនៃមិត្តភាព និងកិច្ចសហប្រតិបត្តិការរវាងចិន និងកម្ពុជាប៉ុណ្ណោះទេ ប៉ុន្តែថែមទាំងស្របទៅនឹងយុទ្ធសាស្ត្រចតុកោណរបស់កម្ពុជាផងដែរ។
សាជីវកម្មថ្នល់ និងស្ពានចិនក៏ជាក្រុមហ៊ុនអភិវឌ្ឍផ្លូវល្បឿនលឿនភ្នំពេញ-ព្រះសីហនុ ប្រវែង១៨៧គីឡូម៉ែត្រ ដែលត្រូវបានដាក់ឱ្យប្រើប្រាស់តាំងពីខែតុលាឆ្នាំមុន។ Xinhua