ក្រុងពោធិ៍សាត់ ស្រុកបាកាន ស្រុកក្រគរ និងស្រុកកណ្តៀង ក្នុងខេត្តពោធិ៍សាត់ ត្រូវបានប្រកាសថាអស់មីនក្រោមមូលនិធិ «កម្ពុជាគ្មានមីននៅឆ្នាំ២០២៥»។
លោក ស៊ុយ សែម រដ្ឋមន្ត្រីក្រសួងរ៉ែ និងថាមពល និងជាតំណាងដ៏ខ្ពង់ខ្ពស់របស់លោកនាយករដ្ឋមន្ត្រី ហ៊ុន សែន បានអញ្ជើញជាអធិបតីក្នុងពិធីប្រកាសអស់មីន ដែលបានធ្វើឡើងកាលពីថ្ងៃទី២២ ខែមិថុនា។
ផ្ទៃដីមានមីនសរុបចំនួន ៩៦ កន្លែង ឬស្មើជិត ២,៤ លានម៉ែត្រការ៉េ ត្រូវបានក្រុមការងារមជ្ឈមណ្ឌលសកម្មភាពកំចាត់មីនកម្ពុជា (ស៊ីម៉ាក់) រុករក និងកម្ទេចចោលបានចំនួន ៤០,៤០៩ គ្រាប់ ដោយមានមីនតោនចំនួន ១០ និងគ្រាប់មិនទាន់ផ្ទុះចំនួន ១៣,០០០ គ្រាប់។
ក្រោមមូលនិធិកម្ពុជាគ្មានមីននៅឆ្នាំ២០២៥ ស៊ីម៉ាក់បានបំពេញបេសកកម្មបោសសម្អាតមីនក្នុងខេត្តចំនួន៥ គឺខេត្តកំពង់ធំ សៀមរាប ព្រះវិហារ ពោធិ៍សាត់ និងប៉ៃលិន។ សម្រាប់ខេត្តពោធិ៍សាត់ ស៊ីម៉ាក់បានចាប់ផ្ដើមពង្រាយកម្លាំងប្រតិបត្តិការតាំងពីខែមករា ឆ្នាំ២០២៣។
ទន្ទឹមនឹងនេះត្រូវបោសសម្អាតមីនក្នុងស្រុកចំនួនបីផ្សេងទៀតក្នុងខេត្តពោធិសាត់ មុននឹងត្រូវបានប្រកាសជាខេត្តអស់មីន។ AKP-C.Nika