សេចក្តីប្រកាសព័ត៌មានរបស់សហព័ន្ធស្រូវអង្ករកម្ពុជាបានអោយដឹងកាលពីថ្ងៃព្រហស្បតិ៍ថា កម្ពុជាបាននាំចេញអង្ករចំនួន ១១៨,០៤១ តោនទៅប្រទេសចិនក្នុងរយៈពេល៥ ខែដំបូងនៃឆ្នាំ២០២៣ ដោយទទួលបានប្រាក់ចំណូលចំនួន៧៧,៤ លានដុល្លារ។
សេចក្តីប្រកាសព័ត៌មានបានបន្តទៀតថា “ប្រទេសចិនគឺជាទីផ្សារនាំចេញដ៏សំខាន់សម្រាប់អង្ករកម្ពុជាដែលមានចំនួន ៤២.៤៣ ភាគរយនៃបរិមាណនាំចេញអង្ករសរុបរបស់កម្ពុជា (ក្នុងអំឡុងខែមករាដល់ខែឧសភា ឆ្នាំ២០២៣)”។
លោក ចាន់ សុខឃាង ប្រធានសហព័ន្ធស្រូវអង្ករកម្ពុជា បាននិយាយថា ប្រទេសចិនគឺជាទីផ្សារដ៏ធំសម្រាប់ទំនិញនេះ។
លោកបានបន្ថែមថា “សហព័ន្ធនឹងបន្តសហការជាមួយក្រសួងពាណិជ្ជកម្ម ដើម្បីធានាថា ការលក់អង្ករប្រចាំឆ្នាំទៅកាន់ប្រទេសចិនបានចំនួន ៤០០,០០០ តោនក្នុងមួយឆ្នាំៗ” ។
យោងតាមសេចក្តីប្រកាសព័ត៌មាន កម្ពុជាបាននាំចេញអង្ករចំនួន ២៧៨,១៨៤ តោនទៅកាន់ប្រទេស និងតំបន់ចំនួន ៥០ ក្នុងរយៈពេល ៥ ខែដំបូងនៃឆ្នាំនេះ ដែលបង្កើតចំណូលបានចំនួន ១៩១,៦ លានដុល្លារ។
ប្រភេទអង្កររួមមាន អង្ករក្រអូប អង្ករសគ្រាប់វែង អង្ករចំហុយ និងអង្ករសរីរាង្គ។
សេចក្តីប្រកាសព័ត៌មានបានអោយដឹងទៀតថា ប្រទេសហ្វីលីពីនគឺជាទីផ្សារថ្មីមួយសម្រាប់អង្កររបស់កម្ពុជា ហើយកម្ពុជាបាននាំចេញអង្ករក្នុងបរិមាណដ៏ធំលើកដំបូងរបស់ខ្លួនចំនួន ២,៥៧៥ តោនទៅកាន់ប្រទេសហ្វីលីពីនកាលពីខែឧសភា។ Xinhua