សហគមន៍មូលដ្ឋាននៅស្រុកសំឡូត ខេត្តបាត់ដំបង ទទួលបានអត្ថប្រយោជន៍ពីកិច្ចខិតខំប្រឹងប្រែងរបស់រដ្ឋាភិបាល និងដៃគូក្នុងការស្តារ និងពង្រីកព្រៃសហគមន៍។
លោក នេត្រ ភក្ត្រា បានមានប្រសាសន៍ថា ដោយសារការកើនឡើងនូវភាពសម្បូរបែបនៃព្រៃឈើដែលត្រូវបានស្ដារឡើងវិញ ជីវភាពរស់នៅរបស់ប្រជាពលរដ្ឋសហគមន៍ត្រូវបានប្រសើរឡើង ជាពិសេសតាមរយៈការចិញ្ចឹមឃ្មុំ និងការប្រមូលផលអនុផលព្រៃឈើ។
រដ្ឋលេខាធិការ និងជាអ្នកនាំពាក្យក្រសួងបរិស្ថាន បានចែករំលែកពីផលវិជ្ជមានក្នុងដំណើរទស្សនកិច្ចរបស់លោកទៅកាន់តំបន់ព្រៃដែលបានស្ដារឡើងវិញក្នុងសហគមន៍តាខេះមានជ័យ ក្នុងស្រុកសំឡូត។
លោកបានមានប្រសាសន៍ថា ព្រៃសហគមន៍នេះមិនត្រឹមតែត្រូវបានស្ដារឡើងវិញដោយការដាំឡើងវិញនូវឈើប្រណីតដូចជាបេង នាងនួន និងធ្នង់ប៉ុណ្ណោះទេ ប៉ុន្តែក៏មានប្រភេទដើមឈើផ្សេងទៀតដែលបង្កើតផ្កា និងផ្លែឈើសម្រាប់សត្វឃ្មុំ ក៏ដូចជាអាហារប្រចាំថ្ងៃសម្រាប់មនុស្សផងដែរ។
វាគឺជាលទ្ធផលនៃកិច្ចខិតខំប្រឹងប្រែងរួមគ្នារបស់ក្រសួងបរិស្ថាន ដោយសហការជាមួយរដ្ឋបាលព្រៃឈើខេត្តបាត់ដំបង និងមូលនិធិ Maddox Jolie-Pitt Foundation (MJP)។
គម្រោងនេះបានចាប់ផ្តើមជាមួយនឹងការបង្កើតការយល់ដឹងអំពីសារៈសំខាន់នៃព្រៃឈើក្នុងចំណោមប្រជាជនសហគមន៍ ដោយឱ្យពួកគេចូលរួមក្នុងការស្តារព្រៃឈើ ណែនាំពួកគេសម្រាប់ការប្រមូលផលអនុផលព្រៃឈើប្រកបដោយនិរន្តរភាព និងបណ្តុះបណ្តាលអ្នកដែលចាប់អារម្មណ៍លើការចិញ្ចឹមឃ្មុំ។
បច្ចុប្បន្ន អ្នកស្រុកបានធ្វើសកម្មភាពអភិរក្ស និងពង្រីកព្រៃសហគមន៍ជាវិជ្ជមានសម្រាប់បរិស្ថាន និងបម្រើជាមធ្យោបាយបង្កើតប្រាក់ចំណូលបន្ថែម និងការផ្គត់ផ្គង់ស្បៀងសម្រាប់ពួកគេ។
បើតាមលោក សេង សាម៉ៃ នាយរងខណ្ឌរដ្ឋបាលព្រៃឈើបានឱ្យដឹងថា សហគមន៍តាខេះមានជ័យ លាតសន្ធឹងលើផ្ទៃដីជាង ១.៣៥៣ ហិកតា ហើយមកដល់ពេលនេះ ដើមឈើចំនួន ១.៤៥០ដើម ត្រូវបានដាំ។ AKP-លឹម ណារី