កាលពីថ្ងៃទី១៧ ខែមិថុនា ក្រុមគ្រូពេទ្យមកពីសមាគមសប្បុរសធម៌ទីក្រុងហូជីមិញ ម្ចាស់ជំនួយ និងអាជ្ញាធរស្រុកស្អាង បានសហការគ្នាផ្តល់ការពិនិត្យ និងថ្នាំដោយឥតគិតថ្លៃដល់ប្រជាពលរដ្ឋក្នុងស្រុកប្រមាណ ៨០០នាក់។

អ្នក​ស្ម័គ្រ​ចិត្តជនជាតិ​វៀតណាម និង​កម្ពុជា​បាន​ជួយបកប្រែ និង​ជួយដឹក​ជញ្ជូនសម្ភារៈ​ដើម្បី​រៀបចំកម្មវិធីនេះ។

Le Thanh Hop សមាជិកនៃសមាគមសប្បុរសធម៌ទីក្រុងហូជីមិញ បាននិយាយថា សមាគមបានចាប់ផ្តើមកម្មវិធីថែទាំសុខភាពកាលពី៨ឆ្នាំមុន ហើយនេះគឺជាលើកទី៣ហើយដែលក្រុមគ្រូពេទ្យរបស់ខ្លួនបានធ្វើដំណើរមកកម្ពុជា។

ចាប់ពីដើមឆ្នាំនេះ ស្ថានទូតវៀតណាមប្រចាំកម្ពុជា អង្គការសប្បុរសធម៌សង្គម ទីភ្នាក់ងារ និងអង្គភាពនានាក្នុងប្រទេសវៀតណាម បានបញ្ជូនក្រុមគ្រូពេទ្យស្ម័គ្រចិត្តមកពិនិត្យសុខភាពដោយឥតគិតថ្លៃដល់ប្រជាពលរដ្ឋដើមកំណើតវៀតណាមនៅកម្ពុជា រួមទាំងជនជាតិខ្មែរផងដែរ។

ដោយសារការពិនិត្យសុខភាពមានតម្លៃខ្ពស់បើធៀបនឹងប្រាក់ចំណូលជាមធ្យមក្នុងប្រទេស សកម្មភាពសប្បុរសធម៌បែបនេះគឺមានប្រយោជន៍ ដែលបង្ហាញពីសាមគ្គីភាព និងមិត្តភាពរវាងវៀតណាម និងកម្ពុជា។ VNA