ជប៉ុន បានស្នើកម្ពុជា គាំទ្រគម្រោងបង្កើតមជ្ឈមណ្ឌលថែទាំមនុស្សចាស់ ដែលមានលក្ខណៈទំនើប និងស្ដង់ដារនៅកម្ពុជា ដើម្បីលើកកម្ពស់ជីវភាព និងសុខភាព សម្រាប់មនុស្សចាស់ជរាគ្មានទីពឹងនៅទូទាំងប្រទេស។
ការស្នើខាងលើនេះ ធ្វើឡើងបន្ទាប់ពីលោក វង សូត រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទា ជួបជាមួយលោក ខនដូ យ៉ូស៊ីអូ (Kondo Yoshio) ប្រធានក្រុមហ៊ុន Procast Cambodia ដើម្បីពិភាក្សាការងារលើវិស័យសុខុមាលភាពមនុស្សចាស់ នៅទីស្តីការក្រសួងកាលពីអង្គារ។
លោក ខនដូ យ៉ូស៊ីអូ បានលើកឡើងថា នៅដំណាច់ឆ្នាំឆ្នាំ២០២៣ សម្រាប់ការងារថែទាំមនុស្សចាស់នៅកម្ពុជា គឺជប៉ុនមានគម្រោងបណ្តុះបណ្តាលអ្នកជំនាញថែទាំមនុស្សចាស់ ដើម្បីមានជំនាញគ្រប់គ្រាន់ និងវិធីសាស្រ្តនៃការថែទាំឱ្យបានត្រឹមត្រូវតាមបទដ្ឋានបច្ចេកទេស។
លោកថា សម្រាប់សិក្ខាកាមរបស់កម្ពុជា នឹងត្រូវហ្វឹកហ្វឺន និងឱ្យចុះអនុវត្តផ្ទាល់នៅទីតាំងថែទាំមនុស្សចាស់នៅប្រទេសជប៉ុន មុននឹងមកបង្រៀនបន្តដល់សិក្ខាកាមនៅកម្ពុជា។
លោកបន្ថែមថា ចំពោះអគារមួយដែលមានស្រាប់ គឺក្រុមជំនាញរបស់ជប៉ុន គ្រោងជួសជុល និងកែលម្អ ដើម្បីឱ្យក្លាយទៅជាអគារដែលមានស្តង់ដាដូចអគារថែទាំមនុស្សចាស់ នៅក្នុងប្រទេសជប៉ុន ដើម្បីឱ្យមានភាពងាយស្រួលដល់មនុស្សចាស់រស់នៅ។
លោក វង សូត ឆ្លើយតបថា សម្រាប់កម្ពុជាចង់ឱ្យមានមណ្ឌលថែទាំមនុស្សចាស់ដែរ ប៉ុន្តែបរិបទកម្ពុជានាពេលបច្ចុប្បន្ន មិនទាន់អាចបង្កើតឱ្យមានមណ្ឌលថែទាំមនុស្សចាស់ឱ្យបានច្រើននោះទេ ព្រោះគ្រួសារភាគច្រើននៅកម្ពុជា ដែលមានឪពុកម្តាយវ័យចាស់ជរា គឺត្រូវមើលថែទាំពីក្រុមគ្រួសារ និងកូនៗ។
រដ្ឋមន្ត្រីបន្ថែមថា ដោយសារក្រុមគ្រួសារ ឬកូនចៅជាអ្នកមើលថែខ្លួនឯងនេះ ព្រោះជាប្រពៃណីតាំងពីបុរាណមក ដែលកូននីមួយៗមានភារកិច្ចត្រូវមើលថែទាំឪពុកម្តាយនៅពេលចាស់ទៅ ឬពេលចាស់ទៅបើគ្មានកូនចៅមើលថែទេ ក៏មានវត្តអារាមសម្រាប់ស្នាក់អាស្រ័យដែរ។
ក្នុងជំនួបនេះ លោក វង សូត បានយល់ព្រមតាមសំណើរបស់លោក ខនដូ
យ៉ូស៊ីអូ ដែលអញ្ជើញឱ្យទៅធ្វើទស្សនកិច្ចសិក្សាដោយផ្ទាល់នៅមជ្ឈមណ្ឌលថែទាំមនុស្សក្នុងប្រទេសជប៉ុន នៅពេលវេលាសមស្របណាមួយ ដើម្បីដកស្រង់បទពិសោធ និងបច្ចេកទេសល្អៗពាក់ព័ន្ធនឹងរបៀបថែទាំមនុស្សចាស់។
អ្នកនាំពាក្យក្រសួងសង្គមកិច្ច អតីតយុទ្ធជន និងយុវនីតិសម្បទា លោក តូច ចាន់នី បានឱ្យដឹងថា បច្ចុប្បន្ន ក្រសួងមានមជ្ឈមណ្ឌលជាតិគាំពារមនុស្សចាស់រាជធានីភ្នំពេញ ដោយបណ្ដុះបណ្ដាលធនធានមនុស្សសម្រាប់មើលថែទាំងមនុស្សចាស់ និងបានលើកទឹកចិត្តឱ្យ
វិស័យដៃគូ និងអង្គការក្រៅរដ្ឋាភិបាល អាចបើកមជ្ឈមណ្ឌលចិញ្ចឹមមនុស្សចាស់បាន។
លោកបញ្ជាក់ថា៖ «យើងមិនមានមណ្ឌលសម្រាប់ចិញ្ចឹមថែទាំមនុស្សចាស់ទេ ជាគោលនយោបាយរបស់យើង ប៉ុន្ដែក្រសួងលើកទឹកចិត្តឱ្យវិស័យឯកជន ឬអង្គការដៃគូបង្កើតមណ្ឌលថែទាំមនុស្សចាស់ តាមរយៈយកមនុស្សចាស់ទៅស្នាក់នៅ ហើយត្រូវបង់ប្រាក់ដូចប្រទេសរីកចម្រើនមួយចំនួនដែរ»៕