គណៈកម្មាធិការជាតិរៀបចំការបោះឆ្នោត (គ.ជ.ប) បានពង្រីកវិសាលភាពដាក់ឱ្យប្រើប្រាស់ប្រព័ន្ធបច្ចេកវិទ្យាទំនើប ដើម្បីត្រួតពិនិត្យ ផ្ទៀងផ្ទាត់ និងបូកសរុបលទ្ធផលបោះឆ្នោត ព្រមទាំងស្វែករកទីតាំការិយាល័យបោះឆ្នោតឃុំ សង្កាត់ នៅទូទាំងប្រទេស។
ការប្រកាសដាក់ឱ្យប្រើប្រាស់ប្រព័ន្ធបច្ចេកវិទ្យាទំនើបខាងលើនេះ ធ្វើឡើងក្នុងពិធីបិទវគ្គបណ្តុះបណ្តាលស្តីពី ការប្រើប្រាស់កម្មវិធីថត បញ្ជូន និងបញ្ចូលទិន្នន័យ ប្រព័ន្ធទីតាំងសកល GPS នៃទីស្នាក់ការគណៈកម្មការឃុំ សង្កាត់ រៀបចំការបោះឆ្នោត ដល់សមាជិកគណៈកម្មការរាជធានី ខេត្តរៀបចំការបោះឆ្នោត នៅទីស្តីការ គ.ជ.ប កាលពីថ្ងៃព្រហស្បតិ៍។
លោក ទេព នីថា អគ្គលេខាធិការ គ.ជ.ប បានឱ្យដឹងថា ចំពោះកម្មវិធីគ្រប់គ្រង និងស្វែងរកទីតាំងការិយាល័យបោះឆ្នោតឃុំ សង្កាត់ គឺជាផ្នែកមួយនៃការធ្វើទំនើបកម្មដំណើរការរៀបចំការបោះឆ្នោតនៅកម្ពុជាប្រកបដោយគុណភាព និងប្រសិទ្ធភាព សម្រាប់ដំណើរការបោះឆ្នោតជ្រើសតាំងតំណាងរាស្ត្រ នីតិកាលទី៧។
លោកបន្ថែមថា គ.ជ.ប បានចាប់ផ្តើមធ្វើទំនើបកម្មដំណើរការរៀបចំការបោះឆ្នោត តាំងពីឆ្នាំ២០១៦ ដើម្បីរៀបចំបញ្ជីបោះឆ្នោតថ្មី ដោយប្រើប្រាស់ប្រព័ន្ធបច្ចេកវិទ្យាព័ត៌មាន ប៉ុន្តែមិនទាន់គ្រប់គ្រាន់នៅឡើយ។
លោកបញ្ជាក់ថា៖ «បច្ចុប្បន្ន គ.ជ.ប បានបន្តពង្រឹង និងពង្រីកវិសាលភាពនៃការប្រើប្រាស់ប្រព័ន្ធបច្ចេកវិទ្យាទំនើបបន្ថែមទៀត ដើម្បីជាជំនួយដល់ការរៀបចំការបោះឆ្នោត [,,,] គឺការបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣»។
លោក ទេព នីថា និយាយថា ការធ្វើទំនើបកម្មសម្រាប់បម្រើឱ្យដំណើរការរៀបចំការបោះឆ្នោត រួមមាន កម្មវិធីរៀបចំបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះ។ កម្មវិធីចេញឯកសារបញ្ជាក់អត្តសញ្ញាណបម្រើឱ្យការបោះឆ្នោត។ កម្មវិធីត្រួតពិនិត្យ ផ្ទៀងផ្ទាត់ និងបូកសរុបលទ្ធផលនៃការបោះឆ្នោត។
លើសពីនេះ ក៏មានកម្មវិធីគ្រប់គ្រងសំណុំរឿង និងរបាយការណ៍ពាក់ព័ន្ធនឹងពាក្យបណ្ដឹង ជាពិសេស កម្មវិធីគ្រប់គ្រង និងស្វែងរកទីតាំងការិយាល័យបោះឆ្នោត ទីតាំងគណៈកម្មការឃុំ សង្កាត់រៀបចំការបោះឆ្នោត ទីតាំងសាលាឃុំ សង្កាត់ និងទីតាំងគណៈកម្មការរាជធានី ខេត្តរៀបចំការបោះឆ្នោត។
អគ្គលេខាធិការ គ.ជ.ប និយាយថា សម្រាប់បញ្ជីឈ្មោះទីតាំងការិយាល័យបោះឆ្នោត ដើម្បីបម្រើឱ្យការបោះឆ្នោតជ្រើសតាំងតំណាងរាស្ត្រ នីតិកាលទី៧ គឺមានសរុប ២៣.៧៨៩ ការិយាល័យ ត្រូវបានបិទផ្សាយជាសាធារណៈនៅទីស្នាក់ការគណៈកម្មការឃុំ សង្កាត់រៀបចំការបោះឆ្នោត នៅទូទាំងប្រទេសកាលពីថ្ងៃទី២៣ ខែមិថុនា ឆ្នាំ២០២៣។
លោកបន្ថែមថា ចំពោះបញ្ជីឈ្មោះទីតាំងការិយាល័យបោះឆ្នោតជាក្រដាសសម្រាប់បិទផ្សាយ គឺ គ.ជ.ប បានអភិវឌ្ឍមធ្យោបាយក្នុងការផ្សព្វផ្សាយឱ្យកាន់តែទូលំទូលាយតាមរយៈកម្មវិធី ក្នុងប្រព័ន្ធប្រតិបត្តិការទូរសព្ទដៃទំនើប
(App) ដែលមានឈ្មោះថា NEC KH ដើម្បីផ្តល់ភាពងាយស្រួល និងចំណេញពេលវេលាដល់អ្នកបោះឆ្នោត និងភាគីពាក់ព័ន្ធ ក្នុងការស្វែងរកទីតាំងការិយាល័យបោះឆ្នោត រួមនឹងទីស្នាក់ការគណៈកម្មការឃុំ សង្កាត់រៀបចំការបោះឆ្នោត និងទីស្នាក់ការគណៈកម្មការរាជធានី ខេត្តរៀបចំការ បោះឆ្នោត។
ក្នុងសេចក្ដីប្រកាសព័ត៌មានរបស់ គ.ជ.ប បានឱ្យដឹងថា ការស្វែងរកទីតាំងការិយាល័យបោះឆ្នោត ត្រូវបានដាក់ឱ្យដំណើរការកាលពីបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ ប៉ុន្តែដោយសារមានការផ្លាស់ប្ដូរទីតាំងមួយចំនួនដោយ កត្តាធម្មជាតិ និងកត្តាផ្សេងៗទៀតនោះ ទើបចាំបាច់ត្រូវធ្វើបច្ចុប្បន្នភាពទីតាំងឡើងវិញ ដើម្បីឱ្យស្របទៅតាមទីតាំងជាក់ស្ដែង សម្រាប់បម្រើឱ្យការបោះឆ្នោតជ្រើសតាំងតំណាងរាស្ត្រ នីតិកាលទី៧។
គួររម្លឹកថា ការបោះឆ្នោតជ្រើសតាំងតំណាងរាស្ត្រ នីតិកាលទី៧ នឹងប្រព្រឹត្តទៅនៅថ្ងៃទី២៣ ខែកក្កដា ឆ្នាំ២០២៣ ដែលមានគណបក្សនយោបាយសរុបចំនួន១៨ ចូលរួមប្រកួតប្រជែង ខណៈគណបក្សភ្លើងទៀន ដែលជាគណបក្សប្រឆាំងដ៏ធំជាងគេនៅកម្ពុជា ត្រូវបានអាក់ខានចូលរួមបោះឆ្នោត ដោយសារ គ.ជ.ប អះអាងថា ខ្វះខាតនីតិវិធីមួយចំនួន។
ព្រឹត្តិការណ៍នៃយុទ្ធនាការឃោសនារកសំឡេងឆ្នោតជ្រើសតាំងតំណាងរាស្ត្រ នីតិកាលទី៧ ប្រព្រឹត្តទៅចាប់ពី
ថ្ងៃទី១ រហូតដល់ថ្ងៃទី២១ ខែកក្កដា ឆ្នាំ២០២៣ ខណៈថ្ងៃទី២២កក្កដា គឺជាថ្ងៃ ស។
គ.ជ.ប ប្រើពេល៦០ថ្ងៃ ដើម្បីផ្ដល់ឱកាសឱ្យសាធារណជនទូទៅអាចស្វែងយល់អំពីការបោះឆ្នោត និងសួរសំណួរពាក់ព័ន្ធនឹងការបោះឆ្នោត នៅតាម វិទ្យ
FM ទូទាំង ២៥ រាជធានី-ខេត្ត ចាប់ពីថ្ងៃទី២០ឧសភា ដល់ថ្ងៃទី២១ ខែកក្កដា ឆ្នាំ២០២៣៕