ព្រឹទ្ធសភាកម្ពុជាបានអនុម័តលើសេចក្តីព្រាងក្រមបរិស្ថាន និងធនធានធម្មជាតិ និងកិច្ចព្រមព្រៀងពាណិជ្ជកម្មសេវាកម្មអាស៊ាន។

ការ​អនុម័ត​នេះត្រូវ​បាន​ធ្វើ​ឡើង​ក្នុង​សម័យ​ប្រជុំ​លើក​ទី​១០ នីតិកាល​ទី​៤ ដែល​បាន​ប្រព្រឹត្ត​ទៅ​នៅ​វិមាន​ព្រឹទ្ធសភា​កាលពី​ម្សិលមិញ​ក្រោម​អធិបតីភាព​សម្តេច សាយ ឈុំ ប្រធាន​ព្រឹទ្ធសភា។

លោក សាយ សំអាល់ រដ្ឋមន្ត្រីក្រសួងបរិស្ថានបានអះអាងថា សេចក្តីព្រាងក្រមបរិស្ថាន និងធនធានធម្មជាតិ បានធ្វើឲ្យប្រសើរឡើងនូវបញ្ញត្តិច្បាប់មួយចំនួនដែលមានភាពមិនច្បាស់លាស់ និងហួសសម័យ ដើម្បីដោះស្រាយបញ្ហាដែលកំពុងកើតមាន និងជួយសម្រួលដល់ការគ្រប់គ្រង និងអភិវឌ្ឍន៍ធនធានធម្មជាតិនៅកម្ពុជាកាន់តែប្រសើរឡើង។

ដោយឡែក សេចក្តីព្រាងច្បាប់ផ្តល់សច្ចាប័នលើកិច្ចព្រមព្រៀងពាណិជ្ជកម្មសេវាកម្មអាស៊ាន ត្រូវបានការពារដោយលោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម។

កិច្ចព្រមព្រៀងនេះមានគោលបំណងពង្រឹងការតភ្ជាប់សេដ្ឋកិច្ច ផ្តល់ឱកាសកាន់តែប្រសើរឡើងសម្រាប់ការអភិវឌ្ឍន៍សេដ្ឋកិច្ច បង្កើនពាណិជ្ជកម្ម និងការវិនិយោគ និងធានាទីផ្សារកាន់តែទូលំទូលាយនៅក្នុងសហគមន៍សេដ្ឋកិច្ចអាស៊ាន។

វាក៏លើកកម្ពស់កិច្ចសហប្រតិបត្តិការផ្នែកច្បាប់ ការអភិវឌ្ឍន៍ធនធានមនុស្ស និងសហគ្រាសធុនតូច និងមធ្យម និងកាត់បន្ថយគម្លាតអភិវឌ្ឍន៍រវាងប្រទេសសមាជិកអាស៊ាន ដើម្បីសម្រេចបានសមភាព និងការអភិវឌ្ឍន៍សេដ្ឋកិច្ចសង្គមប្រកបដោយចីរភាព។

សេចក្តីព្រាងក្រមបរិស្ថាន និងធនធានធម្មជាតិ និងកិច្ចព្រមព្រៀងពាណិជ្ជកម្មសេវាកម្មអាស៊ាន ត្រូវបានរដ្ឋសភាអនុម័តកាលពីថ្ងៃទី៣០ ខែឧសភា ក្នុងសម័យប្រជុំលើកទី៩ នីតិកាលទី៦។  AKP-C.Nika