ព្រឹទ្ធសភាកម្ពុជា បានអនុម័តទាំងស្រុងលើ សេចក្តីព្រាងវិសោធនកម្មច្បាប់បោះឆ្នោត ដោយសំឡេង៥៩ នៃចំនួនសមាជិកព្រឹទ្ធសភា ដើម្បីបន្តថ្វាយព្រះមហាក្សត្រ ទ្រង់ព្រះហស្ដលេខា ចេញព្រះរាជក្រឹត្យដាក់ឱ្យប្រើប្រាស់ជាផ្លូវការ។
ការអនុម័តទាំងស្រុងលើ សេចក្តីព្រាងវិសោធនកម្មច្បាប់បោះឆ្នោត ធ្វើឡើងក្នុងសម័យប្រជុំពេញអង្គព្រឹទ្ធសភា កាលពីព្រឹកម្សិលមិញ បន្ទាប់ពីរដ្ឋសភា បានអនុម័តយល់ព្រមទាំងស្រុងកាលពីថ្ងៃទី២៣ ខែមិថុនា ឆ្នាំ២០២៣ នាសម័យប្រជុំរដ្ឋសភាលើកទី៩ នីតិកាល
ទី៦ ដោយសមាជិករដ្ឋសភាចំនួន១១១រូប។
កាលពីម្សិលមិញ អគ្គលេខាធិការដ្ឋាននៃព្រឹទ្ធសភា បានប្រកាសព័ត៌មានថា វិសោធនកម្មច្បាប់បោះឆ្នោត ធ្វើឡើងដើម្បីលើកស្ទួយគុណតម្លៃនៃលទ្ធិប្រជាធិបតេយ្យ សេរី ពហុបក្ស ដូចបានចារឹកនៅក្នុងរដ្ឋធម្មនុញ្ញ ដែលជាច្បាប់កំពូល ព្រមទាំងដើម្បីពង្រឹង និងលើកកម្ពស់ដំណើរការប្រជាធិបតេយ្យនៅកម្ពុជា។
អគ្គលេខាធិការដ្ឋាននៃព្រឹទ្ធសភា បន្ថែមថា វិសោធនកម្មច្បាប់នេះ ក៏ដើម្បីឱ្យអនាគតអ្នកដឹកនាំនយោបាយ ដែលមានបំណងចង់ឈរឈ្មោះឱ្យគេបោះឆ្នោត ទាំងនៅថ្នាក់ជាតិ និងថ្នាក់ក្រោមជាតិ មានការទទួលខុសត្រូវ ក្នុងនាមជាពលរដ្ឋល្អចំពោះជាតិ និងប្រជាជន ដោយចាប់ផ្តើមពីការអនុវត្តឱ្យបានខ្ជាប់ខ្លួននូវសិទ្ធិបោះឆ្នោត ដែលជាករណីយកិច្ចរបស់ប្រជាពលរដ្ឋគ្រប់រូបចំពោះប្រទេសជាតិនៅក្នុងសង្គមប្រជាធិបតេយ្យ។
សេចក្តីព្រាងច្បាប់នេះ ត្រូវបានរៀបចំឡើងដើម្បីធានាឱ្យគណៈកម្មាធិការជាតិរៀបចំការបោះឆ្នោត ដែលមានសមត្ថកិច្ចរៀបចំ ចាត់ចែង និងគ្រប់គ្រងដំណើរការបោះឆ្នោតជ្រើសតាំងតំណាងរាស្ត្រ ការបោះឆ្នោតជ្រើសរើសក្រុមប្រឹក្សាឃុំ សង្កាត់ ការបោះឆ្នោតជ្រើសតាំងសមាជិកព្រឹទ្ធសភា និងបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុម ស្រុក ខណ្ឌ ពង្រឹងដំណើរការនៃការអនុវត្តលទ្ធិប្រជាធិបតេយ្យ និងពង្រឹងនីតិរដ្ឋឱ្យកាន់តែមានប្រសិទ្ធភាព និងមាននិរន្តរភាព។
រដ្ឋមន្ត្រីក្រសួងយុត្តិធម៌ លោក កើត រិទ្ធ បានឱ្យដឹងថា ការធ្វើវិសោធនកម្មច្បាប់បោះឆ្នោត ដើម្បីកែទម្រង់ សិទ្ធិក្នុងការឈរឈ្មោះឱ្យគេបោះឆ្នោត ដោយចាត់ទុកថា ការកែទម្រង់នេះ ដើម្បីពង្រឹង និងលើកកម្ពស់ដំណើរការប្រជាធិបតេយ្យនៅកម្ពុជា។
កាលពីថ្ងៃពុធ ក្រសួងមហាផ្ទៃ បានប្រកាសព័ត៌មានថា ជាង៣ទសវត្សកន្លងមកនេះ កម្ពុជាតែងអនុវត្តយ៉ាងខ្ជាប់ខ្ជួនតាមស្មារតីនៃរដ្ឋធម្មនុញ្ញ ដោយប្រកាន់យករបបនយោបាយតាមបែប ប្រជាធិបតេយ្យ សេរី ពហុបក្ស ដែលស្តែងតាមរយៈដំណើរការបោះឆ្នោតទាំងសកល និងអសកល សរុបចំនួន១៨លើក។
ក្រសួងបន្ថែមថា ដំណើរការប្រជាធិបតេយ្យ សេរី ពហុបក្ស នៅកម្ពុជា បានចាក់ឫសយ៉ាងរឹងមាំនៅក្នុងសង្គម ទាំងនៅថ្នាក់ជាតិ និងថ្នាក់ក្រោមជាតិ។ ក្នុងស្មារតីបន្តលើកស្ទួយគុណតម្លៃនៃលទ្ធិប្រជាធិបតេយ្យ សេរី ពហុបក្ស រដ្ឋាភិបាលកម្ពុជាបានផ្ដួចផ្ដើមរៀបចំសេចក្តី ព្រាងច្បាប់វិសោធនកម្មច្បាប់បោះឆ្នោត។
ក្រសួងបន្តថា ការកែទម្រង់ សិទ្ធិឈរឈ្មោះឱ្យគេបោះឆ្នោត ដូចមានចែងនៅក្នុងសេចក្តីព្រាងច្បាប់នេះ ត្រូវបានធ្វើឡើងស្របតាមស្មារតីនៃរដ្ឋធម្មនុញ្ញ ដែលចែងថា «បទប្បញ្ញត្តិដកសិទ្ធិបោះឆ្នោត និងសិទ្ធិឈរឈ្មោះឱ្យគេបោះឆ្នោត ត្រូវកំណត់ក្នុងច្បាប់»៕