ក្រសួងសង្គមកិច្ច អតីតយុទ្ធជន និងយុវនីតិសម្បទា បានទុកពេលពីរខែឱ្យ អង្គការជួយកុមារកំព្រា ចាស់ជរា និងជនមរណៈសង្គ្រោះ កែលម្អអង្គការរបស់ខ្លួនឡើងវិញ បន្ទាប់ពីរកឃើញកំហុសមួយចំនួនដែលអង្គការនេះមិនបានបំពេញ ជាពិសេសការគ្រប់គ្រងនិងការថែទាំកុមារមានកម្រិតទាប។
អង្គការជួយកុមារកំព្រា ចាស់ជរា និងជនមរណៈសង្គ្រោះ មានទីតាំងស្ថិតនៅភូមិថ្មកែវ ឃុំត្រប់ ស្រុកបាធាយ ខេត្តកំពង់ចាម ដែលត្រូវបានពលរដ្ឋជាច្រើននាក់លើគ្នាតវ៉ានិងចោទថា ជាអង្គការក្លែងក្លាយដែលបង្កើតឡើង ដើម្បីបោកប្រាស់ជំនួយសប្បុរសជន។ ពួកគេបានស្នើក្រសួងសង្គមកិច្ចបិទដំណើរការអង្គការនេះ។
ក្រសួងសង្គមកិច្ចបានចាត់ក្រុមការងារជំនាញត្រួតពិនិត្យលើបញ្ហានេះ និងបានចេញសេចក្ដីប្រកាសព័ត៌មានពីថ្ងៃចន្ទថា អង្គការជួយកុមារកំព្រា ចាស់ជរា និងជនមរណៈសង្គ្រោះនេះ គឺពុំបានដាក់ពាក្យស្នើសុំចុះបញ្ជីឈ្មោះអង្គការស្របតាមច្បាប់កំណត់ ហើយក៏ពុំមានលិខិតអនុញ្ញាទទួលស្គាល់ជាមណ្ឌលថែទាំកុមារពីក្រសួងសង្គមកិច្ច អតីតយុទ្ធជន និងយុវនីតិសម្បទា។
ក្រសួងរកឃើញទៀតថា៖ «អង្គការនេះពុំបានរៀបចំបែងចែកបន្ទប់តាមភេទ តាមវ័យ គ្មានចំនួនបន្ទប់គ្រប់គ្រាន់ គ្មានអនាម័យសម្រាប់កុមារ មនុស្សពេញវ័យ និងមនុស្ស
វ័យចាស់ដែលស្នាក់នៅក្នុងអង្គការនោះទេ»។
ក្រសួងសង្គមកិច្ចបានដាក់ឱសានុវាទពីរខែដល់អង្គការនេះរៀបចំនីតិវិធីដំណើរការមណ្ឌលថែទាំមនុស្សចាស់ស្របតាមលិខិតបទដ្ឋានគតិយុត្តរបស់ក្រសួង ជាពិសេសតម្រូវឱ្យអនុវត្តតាមនីតិវិធីថែទាំមនុស្សចាស់ដោយសហការជាមួយមន្ទីរសង្គមកិច្ចខេត្តនិងអាជ្ញាធរមូលដ្ឋាន ហើយត្រូវរៀបចំរចនាសម្ព័ន្ធគ្រប់គ្រងរបស់អង្គការឱ្យត្រឹមត្រូវតាមលក្ខន្តិកៈនៃការបង្កើតអង្គការ។
លោក ទូច វឌ្ឍនា ប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទា ខេត្តកំពង់ចាម បានបញ្ជាក់ថា ក្រសួងបានផ្ដល់ជម្រើសដល់អង្គការដែលអាចបន្តថែទាំបានតែមនុស្សចាស់ប៉ុណ្ណោះ ហើយក្រសួងទុកពេលពីរខែសម្រាប់រៀបចំដំណើរការថែទាំមនុស្សចាស់ស្របតាមបទដ្ឋានស្ដង់ដា។
លោកនិយាយថា៖ «ប្រធានអង្គការយល់ព្រមទទួលយកជម្រើសនេះ ប្រសិនបើមិនយល់ព្រមទទួលយកជម្រើសនេះទេ នោះក្រសួងនឹងសម្រេចបិទអង្គការនេះតែម្ដង»។
អ្នកស្រី ឡន សំអន ប្រធានអង្គការជួយកុមារកំព្រា ចាស់ជរា និងជនមរណៈសង្គ្រោះ បានលើកឡើងថា អ្នកស្រីយល់ព្រមតាមក្រសួងសង្គមកិច្ចដែលអនុញ្ញាតឱ្យបន្តដំណើរការមណ្ឌលថែទាំមនុស្ស និងលែងថែទាំកុមារកំព្រាទៀតហើយដោយសារមានកំហុសមួយចំនួនដែលអង្គការមិនបានបំពេញ។
អ្នកស្រីបន្តថា៖ «ខ្ញុំរីករាយដែលក្រសួងសង្គមកិច្ចជួយសម្រាលបន្ទុកខ្ញុំ ហើយខ្ញុំនឹងពន្លឿនការរៀបចំដំណើរការមណ្ឌលថែទាំមនុស្សចាស់តាមការកំណត់របស់ក្រសួងសង្គមកិច្ច»។
អ្នកស្រីបានអះអាងថា អង្គការនេះចាប់ផ្តើមសកម្មភាពតាំងពីឆ្នាំ២០០៦មកម៉្លេះ ហើយនៅឆ្នាំនៅឆ្នាំ២០១៩ អង្គការបានកសាងឡើងអគារស្នាក់នៅមួយនិងរោងបាយមួយនៅលើដីទំហំ៣៥ម៉ែត្រគុណ៤៤ម៉ែត្រក្រោមជំនួយឧបត្ថម្ភកសាងពីព្រះតេជគុណ ជា សុមាលា ព្រមទាំងកៀរគរព្រះសង្ឃ និងសប្បុរសជនគ្រប់កន្លែងសម្រាប់ការចំណាយលើអគ្គិសនី ទឹកស្អាត សម្ភារៈផ្ទះបាយ សម្ភារៈស្នាក់នៅ និងម្ហូបអាហារ៕
Related Posts
- January 10, 2023
- January 20, 2023
- December 19, 2022
- September 5, 2023
