លោកនាយករដ្ឋមន្រ្តី ហ៊ុន សែន បានជំរុញឱ្យពន្លឿនការរៀបចំក្របខណ្ឌច្បាប់ ក៏ដូចជាហេដ្ឋារចនាសម្ព័ន្ធនានា ដើម្បីពន្លឿនដំណើរការតុលាការពាណិជ្ជកម្ម ដើម្បីធានាដល់ការដោះស្រាយវិវាទពាណិជ្ជកម្មនិងធុរកិច្ច និងជាការលើកកម្ពស់បរិយាកាសវិនិយោគនិងធុរកិច្ចនៅកម្ពុជា។
ក្នុងពិធីសម្ពោធដាក់ឱ្យប្រើប្រាស់ជាផ្លូវការ «អគារសាលាយុត្តិធម្ម» នៅថ្ងៃទី២៦ ខែមិថុនា លោកនាយករដ្ឋមន្រ្តី ហ៊ុន សែន មានប្រសាសន៍ណែនាំក្រសួងយុត្តិធម៌រៀបចំក្របខណ្ឌច្បាប់លើការបង្កើតតុលាការពាណិជ្ជកម្ម ប្រកបដោយគុណភាព តម្លាភាព និងភាពជឿទុកចិត្តបានសម្រាប់បង្កើនជំនឿទុកចិត្តលើការវិនិយោគនិងការធ្វើធុរកិច្ចនៅកម្ពុជា។
លោកមានប្រសាសន៍ថា៖ «គប្បីពន្លឿនច្បាប់ទាក់ទងនឹងតុលារការពាណិជ្ជកម្ម។ ខ្ញុំស្នើ គួរតែខិតខំជំរុញឱ្យចេញនៅក្នុងនីតិកាលខាងមុខនេះនូវច្បាប់ស្តីអំពីតុលាការពាណិជ្ជកម្ម។ រៀបចំតុលារការពាណិជ្ជកម្មនេះឡើង ដើម្បីកាត់ក្តីទៅលើរឿងនេះ»។
បើតាមក្រសួងយុត្តិធម៌ ការបង្កើតតុលាការឯកទេសមួយនេះដើម្បីបង្កើនជំនឿទុកចិត្ដពីអ្នកវិនិយោគតាមរយៈបង្កើនគុណភាពនៃសេវាក្នុងការដោះស្រាយសំណុំរឿងក្ដីទៅតាមជំនាញនីមួយៗ ដែលចូលរួមកាត់បន្ថយការកកស្ទះសំណុំរឿងតុលាការតាមរយៈដំណើរការនីតិវិធីបានលឿនជាងមុន។
ការដាក់ឱ្យដំណើរការតុលាការពាណិជ្ជកម្មនេះ គឺជំហ៊ានដំបូងធ្វើឡើងនៅរាជធានីភ្នំពេញ។ ក្នុងនោះមានទាំងសាលាដំបូងនិងសាលាឧទ្ធរណ៍នៅជាមួយគ្នាតែម្ដង។ ជំហាន
បន្ទាប់ អាចគ្រោងបង្កើតនៅខេត្តព្រះសីហនុ ហើយជាពិសេសនៅតំបន់ណាដែលមានការធ្វើពាណិជ្ជកម្មច្រើន។
សូមបញ្ជាក់ថា បច្ចុប្បន្នកម្ពុជាដំណើរការតែតុលាការព្រហ្មទណ្ឌ និងតុលាការរដ្ឋប្បវេណីប៉ុណ្ណោះ។ រាល់សំណុំរឿង ដែលពាក់ព័ន្ធនឹងវិវាទផ្នែកពាណិជ្ជកម្មនិងផ្នែកការងារត្រូវបញ្ជូនទៅឱ្យតុលាការរដ្ឋប្បវេណីកាត់ក្តី។
លោក លឹម ហេង អនុប្រធានសភាពាណិជ្ជកម្មកម្ពុជាមានប្រសាសន៍ថា នៅពេលដំណើរការតុលាការពាណិជ្ជកម្មនឹងដំណើរការវិវាទពាណិជ្ជកម្មនៅតុលាការរបស់ខ្លួនក្នុងក្រុងភ្នំពេញដាច់ដោយឡែកពីតុលាការព្រហ្មទណ្ឌ។
លោកមានប្រសាសន៍ថា មានសំណុំរឿងពាណិជ្ជកម្មច្រើនដែលនឹងត្រូវពិចារណាក្នុងការបង្កើតតុលាការពាណិជ្ជនេះ។
លោកមានប្រសាសន៍បន្ថែមថា សភាពាណិជ្ជកម្មកម្ពុជានិងក្រសួងកំពុងធ្វើការលើការបង្កើតតុលាការពាណិជ្ជកម្មនេះ ដើម្បីដោះស្រាយវិវាទពាណិជ្ជកម្មប្រកបដោយតម្លាភាព។
លោកមានប្រសាសន៍ថា៖ «បើយើងមានតុលាការពាណិជ្ជកម្ម វានឹងជំរុញឱ្យមានការវិនិយោគបន្ថែមទៀត ដើម្បីឱ្យពាណិជ្ជករមានទំនុកចិត្តលើប្រព័ន្ធយុត្តិធម៌របស់យើង»។
លោក កើត រិទ្ធ រដ្ឋមន្ត្រីក្រសួងយុត្តិធម៌សម្រេចបង្កើតគណៈកម្មការរៀបចំកិច្ចដំណើរការនីតិវិធីរបស់តុលាការពាណិជ្ជកម្ម នៅខែមករា ឆ្នាំ២០២១។
ក្រសួងបាននិយាយនៅចុងឆ្នាំ២០២២ថា ការបង្កើតតុលាការពាណិជ្ជកម្មអាចធ្វើឡើងនៅឆ្នាំ២០២៣។
ក្រសួងយុត្តិធម៌និងធនាគារអភិវឌ្ឍអាស៊ី កាលពីខែកុម្ភៈ ឆ្នាំ២០២៣ បានចុះហត្ថលេខាលើអនុស្សរណៈនៃការយោគយល់គ្នា ដើម្បីបង្កើតតុលាការពាណិជ្ជកម្មនៅកម្ពុជា។
តាមរយៈអនុស្សរណៈនៃការយោគយល់គ្នានេះ ធនាគារអភិវឌ្ឍអាស៊ីគាំទ្រក្រសួងយុត្តិធម៌លើផ្នែកបច្ចេកទេស ពិសេសការរៀបចំច្បាប់ និងលើការចូលរួមជួយបណ្តុះបណ្តាលធនធានមនុស្ស ដើម្បីធានាដល់ការរៀបចំ និងការដាក់ឱ្យដំណើរការតុលាការពាណិជ្ជកម្ម ប្រកបដោយតម្លាភាព ប្រសិទ្ធភាព និងជំនឿទុកចិត្តនៅកម្ពុជា៕
ប្រែសម្រួលដោយ៖ សុ ជាតា