កសិដ្ឋានចេកដែលវិនិយោគដោយចិននៅស្រុកស្ទឹងត្រង់ ខេត្តកំពង់ចាម គ្រោងនឹងពង្រីកការដាំដុះរបស់ខ្លួន ដើម្បីឆ្លើយតបនឹងការកើនឡើងនៃតម្រូវការទីផ្សារក្រៅប្រទេស។
យោងតាមលោក Wu Fuxiang នៃក្រុមហ៊ុនវិនិយោគ NONG YE FAZHAN CO., LTD. បានឱ្យដឹងថា ក្រុមហ៊ុនបានវិនិយោគជាង ១៦ លានដុល្លារអាមេរិកក្នុងឆ្នាំ២០២១ លើផ្ទៃដីចំនួន ៦០០ ហិកតា ហើយចំការត្រូវបានដាំដុះទាំងស្រុងឥឡូវនេះ។
លោកបានប្រាប់ក្រុមអ្នកយកព័ត៌មានក្នុងអំឡុងពេលដំណើរទស្សនកិច្ចប្រព័ន្ធផ្សព្វផ្សាយរបស់ពួកគេទៅកាន់កសិដ្ឋានដែលរៀបចំដោយកាសែត People’s Daily កាលពីសប្តាហ៍មុនថា ដើម្បីឆ្លើយតបទៅនឹងតម្រូវការកើនឡើងសម្រាប់ការនាំចេញចេក ក្រុមហ៊ុនរបស់លោកនឹងពង្រីកការដាំដុះរបស់ខ្លួន។
លោកបានបន្ថែមថា ចេកស្រស់ប្រហែល ២,០០០ ទៅ ៤០,០០០តោន ត្រូវបាននាំចេញទៅប្រទេសចិនតែមួយ ក្នុងមួយឆ្នាំៗ ហើយវាបានក្លាយទៅជាការពេញនិយមយ៉ាងខ្លាំង។
បច្ចុប្បន្នក្រុមហ៊ុននេះមានបុគ្គលិកជនជាតិចិនប្រមាណ២០នាក់ និងកម្មករខ្មែរជាង១២០០នាក់។
ប្រទេសចិនគឺជាទីផ្សារដ៏ធំសម្រាប់ផលិតផលកសិកម្មដ៏មានសក្តានុពលរបស់កម្ពុជា មិនត្រឹមតែសម្រាប់ចេកស្រស់ប៉ុណ្ណោះទេ ថែមទាំងសម្រាប់អង្ករ ដំឡូងមី ស្វាយ និង ផ្លែមៀនផងដែរ។
កម្ពុជាបាននាំចេញផ្លែចេកស្រស់ដំបូងរបស់ខ្លួនជាផ្លូវការទៅប្រទេសចិនក្នុងខែឧសភា ឆ្នាំ២០១៩។
យោងតាមក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ក្នុងរយៈពេល ១១ ខែដំបូងនៃឆ្នាំ ២០២២ កម្ពុជាបាននាំចេញចេកស្រស់សរុបចំនួន ៣៤៥,៤៧០ តោន ធ្លាក់ចុះ ១២,៧៣ ភាគរយធៀបនឹងរយៈពេលដូចគ្នាក្នុងឆ្នាំ ២០២១។ AKP-អ៊ុំ សុផាត