លោកនាយករដ្ឋមន្ត្រី ហ៊ុន សែន បានរំឭកម្តងហើយម្តងទៀតពីផលប៉ះពាល់អវិជ្ជមាននៃសង្រ្គាមរុស្ស៊ី-អ៊ុយក្រែនដែលកំពុងបន្ត។ ក្នុងពិធីជួបសំណេះសំណាលជាមួយកម្មករ និងនិយោជិតប្រមាណ ១៩,០០០នាក់ មកពីរោងចក្រ សហគ្រាសចំនួន១៣ ក្នុងរាជធានីភ្នំពេញ និងខេត្តកណ្តាល ដែលបានប្រព្រឹត្តិទៅនៅពហុកីឡដ្ឋានជាតិមរតកតេជោ ក្នុងខណ្ឌជ្រោយចង្វារ រាជធានីភ្នំពេញ កាលពីព្រឹកថ្ងៃសៅរ៍នេះ លោកបានមានប្រសាសន៍ថា ដរាបណាសង្រ្គាមរុស្ស៊ី-អ៊ុយក្រែនមិនទាន់ចប់ទេ សេដ្ឋកិច្ចពិភពលោកនឹងបន្តប្រឈមនឹងការលំបាក។
លោកបានគូសបញ្ជាក់ថា «ខណៈដែលសង្រ្គាមនៅតែបន្ត សេដ្ឋកិច្ចពិភពលោកនឹងនៅតែរងផលប៉ះពាល់ជាអវិជ្ជមាន ហើយមនុស្សគ្រប់រូប មិនថានៅអឺរ៉ុប ឬសូម្បីតែនៅកម្ពុជា ក៏នឹងត្រូវរងផលប៉ះពាល់»ពីវិបត្តិនេះផងដែរ។
លោកបានបន្ថែមថា ដោយសារទីផ្សារអឺរ៉ុបបានកាត់បន្ថយការបញ្ជាទិញពីកម្ពុជា រាជរដ្ឋាភិបាលកំពុងធ្វើពិពិធកម្មទីផ្សារនាំចេញទៅកាន់ប្រទេសជប៉ុន អារ៉ាប់រួម… ដើម្បីធានាទីផ្សារសម្រាប់ផលិតផលកម្ពុជា។
យោងតាមមូលនិធិរូបិយវត្ថុអន្តរជាតិ (IMF) ចំពេលមានភាពចលាចលក្នុងវិស័យហិរញ្ញវត្ថុ អតិផរណាខ្ពស់ សង្រ្គាមនៅអ៊ុយក្រែនដែលកំពុងបន្ត និងរយៈពេលបីឆ្នាំនៃការរីករាលដាលនៃជំងឺកូវីដ ការព្យាករណ៍សេដ្ឋកិច្ចពិភពលោកសម្រាប់កំណើននឹងធ្លាក់ចុះពី ៣.៤ភាគរយនៅឆ្នាំ២០២២ មកត្រឹម២.៨ ភាគរយ នៅឆ្នាំ២០២៣ មុននឹងកើនឡើងដល់៣.០ ភាគរយនៅឆ្នាំ២០២៤ ។
ប្រទេសដែលមានសេដ្ឋកិច្ចជឿនលឿនត្រូវបានគេរំពឹងថានឹងមានកំណើនធ្លាក់ចុះ២.៧ ភាគរយនៅឆ្នាំ ២០២២ ដល់ ១.៣ ភាគរយនៅឆ្នាំ២០២៣។
ដោយឡែកភាពតានតឹងផ្នែកហិរញ្ញវត្ថុដែលកំពុងបន្តកើនឡើងបណ្តាលអោយកំណើនសេដ្ឋកិច្ចពិភពលោកបានធ្លាក់ចុះប្រហែល ២.៥ ភាគរយនៅឆ្នាំ២០២៣ស្របពេលដែលប្រទេសដែលមានសេដ្ឋកិច្ចជឿនលឿនកំណើនធ្លាក់ចុះក្រោម១ ភាគរយ។
អតិផរណាជាសកលត្រូវបានកំណត់ថានឹងធ្លាក់ចុះពី ៨.៧ ភាគរយក្នុងឆ្នាំ២០២២ មកត្រឹម ៧. ភាគរយនៅឆ្នាំ២០២៣ ដោយផ្អែកលើតម្លៃទំនិញទាប ប៉ុន្តែអតិផរណាមូលដ្ឋានទំនងជានឹងធ្លាក់ចុះយឺតជាងនេះ។ ការគ្រប់គ្រងអតិផរណាអោយត្រឡប់ទៅកាន់ស្ថានភាពធម្មតាទំនងមិនអាចកើតមានឡើងរហូតដល់ឆ្នាំ២០២៥។
សង្គ្រាមរុស្ស៊ី-អ៊ុយក្រែនបានចាប់ផ្តើមនៅថ្ងៃទី ២៤ ខែកុម្ភៈ ឆ្នាំ ២០២២ នៅពេលដែលរុស្ស៊ីបានចាប់ផ្តើមប្រតិបត្តិការយោធា និងចូលកាន់កាប់ផ្នែកខ្លះនៃទឹកដីអ៊ុយក្រែន។
ហេង បញ្ញា- AKP