ក្រសួងអប់រំ យុវជន និងកីឡា បានអះអាងថា ចាប់ពីឆ្នាំ២០២០ រហូតមកដល់ខែមិថុនា ឆ្នាំ២០២៣ មូលនិធិស្រាវជ្រាវ គំនិតច្នៃប្រឌិត និងនវានុវត្តន៍ (ស.គ.ន.) បានផ្ដល់ការឧបត្ថម្ភថវិកាដល់គ្រឹះស្ថានឧត្តមសិក្សាសាធារណៈនិងឯកជន ដើម្បីការរៀបរៀង និពន្ធ និងកែលម្អសៀវភៅសិក្សាដែលនឹងត្រូវប្រើប្រាស់នៅកម្រិតឧត្តមសរុបចំនួន ១ ៥៦៥ ចំណងជើង។
ការផ្ដល់ការគាំទ្រនេះធ្វើឡើងបន្ទាប់ពីគ្រឹះស្ថានឧត្តមសិក្សាសាធារណៈនិងឯកជនចំនួន២១បានស្នើសុំមូលនិធិពិនិត្យលទ្ធភាពនិងផ្ដល់ការឧបត្ថម្ភថវិកា ដើម្បីរៀបរៀង និពន្ធ និងកែលម្អសៀវភៅចំនួន ១ ៦៥៦ចំណងជើង។
មូលនិធិស្រាវជ្រាវ គំនិតច្នៃប្រឌិត និងនវានុវត្តន៍ ត្រូវបានបង្កើតឡើងក្រោមគំនិតផ្តួចផ្តើមពីក្រសួងសេដ្ឋកិច្ចនិងហិរញ្ញវត្ថុ និងក្រសួងអប់រំ យុវជន និងកីឡា ដើម្បីរួមចំណែកលើកកម្ពស់វប្បធម៌នៃការស្រាវជ្រាវ បំផុសគំនិតច្នៃប្រឌិត និងជំរុញនវានុវត្តន៍ដើម្បីជាប្រយោជន៍ដល់វិស័យអប់រំ យុវជន និងកីឡា ដែលឆ្លើយតបទៅនឹងទីផ្សារពលកម្មនិងសកលភាវូបនីយកម្ម។
លោក សាន វឌ្ឍនា អនុរដ្ឋលេខាធិការក្រសួងអប់រំ យុវជន និងកីឡា បានប្រាប់ខ្មែរថាមស៍ពីម្សិលមិញថា មូលនិធិស្រាវជ្រាវ គំនិតច្នៃប្រឌិត និងនវានុវត្តន៍ បានផ្ដល់ការគាំទ្រលើការរៀបរៀង និពន្ធ និងការកែលម្អសៀវភៅសិក្សា ដែលជាសកម្មភាពជាអាទិភាពមួយក្នុងគោលដៅបង្កើនបរិមាណលើកកម្ពស់គុណភាព និងពង្រីកសមធម៌នៃធនធានសិក្សាជាខេមរភាសាសម្រាប់និស្សិត និងអ្នកស្រាវជ្រាវកម្ពុជា។
លោកបន្តថា ធនធានសៀវភៅសិក្សាដែលបានទទួលការគាំទ្រជាថវិកាសម្រាប់ការរៀបរៀង និពន្ធ និងកែលម្អ រួមមាន សៀវភៅសិក្សាតាមមុខវិជ្ជាដែលប្រើប្រាស់នៅគ្រឹះស្ថានឧត្តមសិក្សា សៀវភៅសិក្សាសម្រាប់គរុសិស្សនិស្សិតនៅតាមគ្រឹះស្ថានបណ្តុះបណ្តាលគ្រូ សៀវភៅសិក្សាសម្រាប់ការអប់រំបច្ចេកទេស សៀវភៅសិក្សាគោលសម្រាប់កម្រិតមធ្យមសិក្សា សៀវភៅជាស្នាដៃសិស្សនៃក្លឹបអ្នកនិពន្ធនៅតាមគ្រឹះស្ថានមធ្យមសិក្សា និងធនធានអំណានទូទៅ។
លោក សាន វឌ្ឍនា ទទួលស្គាល់ថា គ្រូបង្រៀនតាមបណ្ដាគ្រឹះស្ថានឧត្តមសិក្សាមួយចំនួននៅមិនទាន់មានឯកសារឬសៀវភៅសិក្សាបានគ្រប់គ្រាន់នៅឡើយទេ។ ដោយហេតុនេះហើយទើបជំរុញឱ្យមានការបង្កើតធនធានសៀវភៅសិក្សានៅតាមគ្រឹះស្ថានឧត្តមសិក្សាឱ្យបានច្រើន។
លោកថា៖ «មុខវិជ្ជាឯកទេសថ្មីៗមួយចំនួនទាមទារឯកសារ សៀវភៅ និងការស្រាវជ្រាវបន្ថែម ដូចជាមុខវិជ្ជាបច្ចេកវិទ្យាកសិកម្មជាន់ខ្ពស់ជាដើម ដែលត្រូវការឱ្យមានសៀវភៅថ្មីៗជាច្រើន ហើយខាងខ្ញុំត្រៀមថវិកាដើម្បីគាំទ្រជូនដល់លោកគ្រូអ្នកគ្រូរៀបរៀង និពន្ធ និងកែលម្អសៀវភៅសិក្សាដែលមានស្រាប់»។
លោកបានលើកទឹកចិត្ដដល់សាស្ត្រាចារ្យ អ្នកនិពន្ធ និងអ្នកស្រាវជ្រាវនៅតាមបណ្តាគ្រឹះស្ថានឧត្តមសិក្សាសាធារណៈនិងឯកជនទាំងអស់បន្តចូលរួមក្នុងគម្រោងនេះក្នុងស្មារតីជំរុញឱ្យសៀវភៅសិក្សាមានគុណភាពខ្ពស់និងមានសមធម៌។
ក្នុងសេចក្ដីប្រកាសរបស់ក្រសួងអប់រំ យុវជន និងកីឡា កាលពីថ្ងៃអង្គារ បានលើកឡើងថា ដើម្បីបន្តចូលរួមដោះស្រាយបញ្ហាកង្វះឯកសារសម្រាប់សិស្សសិក្សាស្រាវជ្រាវនិងបង្កើនធនធានសិក្សាសម្បូរបែបសម្រាប់ការរៀននិងបង្រៀន ក្រសួងអប់រំបានផ្តល់ការឯកភាពដល់នាយកដ្ឋានតម្រង់ទិសវិជា្ជជីវៈចំពោះការស្នើសុំរៀបរៀងនិងនិពន្ធសៀវភៅជំនួយស្មារតីផ្នែកអប់រំបច្ចេកទេសលើកម្មវិធីសិក្សាចំនួន៦ជំនាញ។ ក្នុងនោះរួមមាន បសុវប្បកម្ម១០ចំណងជើង ក្សេត
សាស្ត្រប្រាំពីរចំណងជើង កែច្នៃអារហារបួនចំណងជើង មេកានិចមួយចំណងជើង អេឡិចត្រូនិចបួនចំណងជើង និងអគ្គិសនីមួយចំណងជើង ដែលសរុបទាំងអស់ ២៧ចំណងជើង។
ក្រសួងអប់រំ យុវជន និងកីឡា បានបញ្ជាក់ថា ភាពសម្បូរបែបនៃសៀវភៅសិក្សានិងធនធានសិក្សា គឺជាផ្នែកមួយដ៏សំខាន់សម្រាប់ក្របខណ្ឌវាយតម្លៃគុណភាពអប់រំរបស់គ្រឹះស្ថានឧត្តមសិក្សា។
លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា មានប្រសាសន៍ក្នុងសេចក្ដីប្រកាសថា៖ «សៀវភៅកំណត់ចំណេះដឹង ចំណេះដឹងកំណត់ការអប់រំ ការអប់រំកំណត់ការអភិវឌ្ឍ បើគ្មានសៀវភៅ គ្មានទេការអភិវឌ្ឍ»៕