ពីរឆ្នាំក្រោយមក កិច្ចព្រមព្រៀងពាណិជ្ជកម្មដ៏ធំបំផុតរបស់ពិភពលោកបានផ្តល់នូវអត្ថប្រយោជន៍យ៉ាងច្រើនសម្រាប់បណ្តាប្រទេសនៅក្នុងតំបន់អាស៊ីប៉ាស៊ីហ្វិក ដោយបានជួយស្តារសេដ្ឋកិច្ចនៅក្នុងប្រទេសទាំងនោះឡើងវិញ។
កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) ដែលបានចូលជាធរមាននៅថ្ងៃទី ១ ខែមករា ឆ្នាំ២០២២មានសមាជិកចំនួន១៥ប្រទេសរួមមានប្រទេសសមាជិកអាស៊ានចំនួន១០ ចិន ជប៉ុន សាធារណរដ្ឋកូរ៉េ អូស្ត្រាលី និងនូវែលសេឡង់។ រួមគ្នាប្រទេសទាំងនេះគ្របដណ្តប់ប្រហែល៣០ ភាគរយនៃចំនួនប្រជាជនពិភពលោក និង៣០ ភាគរយនៃទំហំសេដ្ឋកិច្ច និងពាណិជ្ជកម្មពិភពលោក។
សមាជិកអាស៊ាននៅតែជាដៃគូពាណិជ្ជកម្មដ៏ធំបំផុតរបស់ចិនក្នុងរយៈពេល១១ ខែដំបូងនៃឆ្នាំ២០២៣ដែលទំហំពាណិជ្ជកម្មសរុបមានរហូតដល់៨១៧ ពាន់លានដុល្លារ។
ក្នុងអំឡុងពេលដែលកិច្ចពិភពលោកបានប្រឈមនឹងបញ្ហាជាច្រើននៅពេលថ្មីៗនេះ កិច្ចព្រមព្រៀងRCEP បានដើរតួនាទីយ៉ាងសំខាន់ក្នុងការរក្សាស្ថិរភាពសេដ្ឋកិច្ចនៃប្រទេសសមាជិករបស់ខ្លួន។
រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្មកម្ពុជា លោក ប៉ែន សុវិជាតិ បាននិយាយថា “កិច្ចព្រមព្រៀងនេះបានជួយស្តារសេដ្ឋកិច្ចប្រទេសសមាជិកក្រោយជំងឺរាតត្បាត និងកំណើនសេដ្ឋកិច្ចរយៈពេលវែងប្រកបដោយនិរន្តរភាព រួមចំណែកលើកកម្ពស់សន្តិភាព ស្ថិរភាព ភាពសុខដុមរមនាក្នុងតំបន់ ការអភិវឌ្ឍន៍ និងវិបុលភាព”។
ដោយសារពន្ធអនុគ្រោះក្រោមកិច្ចព្រមព្រៀង RCEP ទំហំពាណិជ្ជកម្មរបស់កម្ពុជាជាមួយសមាជិកផ្សេងទៀតបានកើនឡើង។ កម្ពុជាបាននាំចេញផលិតផលមានតម្លៃ ៧,២១ ពាន់លានដុល្លារទៅកាន់បណ្តាប្រទេសសមាជិក RCEP ក្នុងរយៈពេល ១១ ខែដំបូងនៃឆ្នាំ ២០២៣ កើនឡើង ២៧ ភាគរយពី ៥,៦៧ ពាន់លានដុល្លារក្នុងរយៈពេលដូចគ្នានៃឆ្នាំ ២០២២។
ក្នុងរយៈពេល១០ ខែដំបូងនៃឆ្នាំ២០២៣ទំហំសរុបនៃពាណិជ្ជកម្មទ្វេភាគីចិន-ម៉ាឡេស៊ីបានឈានដល់ ១៥៥,៧៣ ពាន់លានដុល្លារអាមេរិក ដែលស្មើនឹង ២,.៨ ភាគរយនៃពាណិជ្ជកម្មសរុបរបស់ចិនជាមួយអាស៊ានក្នុងអំឡុងពេលនេះ។
កិច្ចព្រមព្រៀង RCEP ផ្តល់អត្ថប្រយោជន៍ជាច្រើនដូចជា ការកាត់បន្ថយពន្ធ ការសម្របសម្រួលពាណិជ្ជកម្ម និងការបើកទូលាយសេវាកម្ម និងការវិនិយោគ ដោយផ្តល់សារៈសំខាន់លើពហុភាគីនិយម និងសេដ្ឋកិច្ចបើកចំហ។
នៅក្នុងខែវិច្ឆិកា ឆ្នាំ២០២៣ អាជ្ញាធរចិនបានចេញវិញ្ញាបនបត្របញ្ជាក់ប្រភពដើមទំនិញចំនួន ១៩.៨៣៤ ដែលមានតម្លៃ 568 លានដុល្លារអាមេរិក ក្រោមកិច្ចព្រមព្រៀង RCEP ។ ចំនួននៃវិញ្ញាបនបត្របែបនេះដែលចេញដល់សហគ្រាសចំនួន ៣.៤៣៤ បានកើនឡើង ១២,៤១ ភាគរយបើធៀបនឹងឆ្នាំមុន ហើយត្រូវបានគេរំពឹងថានឹងកាត់បន្ថយពន្ធសម្រាប់ផលិតផលចិនដែលមានទំហំទឹកប្រាក់ចំនួន៩ លានដុល្លារនាំចូលទៅក្នុងប្រទេសជាសមាជិក។
ប្រទេសចិននៅតែប្តេជ្ញាចិត្តចំពោះការអនុវត្តកិច្ចព្រមព្រៀងRCEP ដើម្បីលើកកម្ពស់សមាហរណកម្មសេដ្ឋកិច្ចក្នុងតំបន់ ដោយកិច្ចព្រមព្រៀងRCEP បានអនុញ្ញាតឱ្យប្រទេសសមាជិកផ្សេងទៀតទទួលបានអត្ថប្រយោជន៍ពីឱកាសអភិវឌ្ឍន៍របស់ប្រទេសចិន។
នៅឆ្នាំ២០២៤កិច្ចព្រមព្រៀងពាណិជ្ជកម្មសេរីនេះនឹងតែបន្តដើរតួនាទីជាសសរស្តម្ភដ៏រឹងមាំ ដែលផ្តល់នូវស្ថិរភាព និងភាពប្រាកដប្រជា ចំពេលមានការងើបឡើងវិញនៃសេដ្ឋកិច្ចសកល និងបញ្ហាប្រឈម។ អត្ថប្រយោជន៍នៃកិច្ចព្រមព្រៀងនេះនៅតែបន្តផ្តល់អោយទៅថ្ងៃអនាគត។