លោកនាយករដ្ឋមន្រ្តី ហ៊ុន សែន មានប្រសាសន៍ថា តំបន់នៅទិសនិរតីរបស់កម្ពុជាមានសក្តានុពលសម្រាប់ការវិនិយោគ ដោយសារមានការតភ្ជាប់ហេដ្ឋារចនាសម្ព័ន្ឋល្អ ងាយស្រួលក្នុងការដឹកជញ្ជូន និង មានការផ្គត់ផ្គង់អគ្គិសនីគ្រប់គ្រាន់។
លោកមានប្រសាសន៍យ៉ាងដូច្នេះក្នុងឱកាសជួបជាមួយកម្មករ-កម្មការិនីរោងចក្រនៅខេត្តកំពង់ស្ពឺកាលពីថ្ងៃអង្គារ ។ លោកមានប្រសាសន៍ថា ខេត្តកំពង់ស្ពឺ និងតំបន់នៅទិសនិរតីរបស់កម្ពុជាមានសក្តានុពលខ្ពស់ក្នុងការការវិនិយោគ។
លោកនាយករដ្ឋមន្រ្តីមានប្រសាសន៍ដោយមោទនភាព ពីការរីកចម្រើនរបស់ខេត្តកំពង់ស្ពឺ ដែលធ្លាប់ជាខេត្តក្រីក្រមួយ បានក្លាយទៅជាតំបន់រោងចក្រ សហគ្រាស និងតំបន់ឧស្សាហកម្មធន់ធ្ងន់ សម្រាប់ដំណើរឈានឡើង នៃសេដ្ឋកិច្ចរបស់ខេត្ត និងក្នុងក្របខណ្ឌទូទាំងប្រទេស។
លោកមានប្រសាសន៍បន្តទៀតថា ខេត្តភាគនិរតី នៃប្រទេសកម្ពុជា បានក្លាយជាខេត្ត នៃសេដ្ឋកិច្ចពហុបំណង រួមទាំងនាំចេញតាមច្រកសមុទ្រទៅកាន់ទីផ្សារអន្តរជាតិ បានដោយងាយស្រួលដែលមាន ផ្លូវជាតិខ្វាត់ខ្វែង និងកំពង់ផែទឹកជ្រៅ។
យោងតាមក្រសួងការងារ ក្នុងឆ្នាំ២០២៣នេះ ខេត្តកំពង់ស្ពឺ មានរោងចក្រ សហគ្រាសចំនួន៣៨៥ មានកម្មករ និយោជិតជាង ១៥ម៉ឺន ៥ពាន់នាក់ ដែលមានប្រាក់ឈ្នួលមធ្យមសរុបជាង ៤៨១លានដុល្លារក្នុងមួយឆ្នាំ។
ក្នុងនោះរោងចក្រ សហគ្រាសវិស័យកាត់ដេរចំនួន១៩១ មានកម្មករនិយោជិតសរុបជាង ១៤ម៉ឺន ៥ពាន់នាក់ ដែលមានប្រាក់ឈ្នួលមធ្យមសរុបជាង ៤៥១លានដុល្លារក្នុងមួយឆ្នាំ។ ខេត្តកំពង់ស្ពឺ ជាខេត្តទី២ ដែលមានការអភិវឌ្ឍរោងចក្រ សហគ្រាសច្រើនជាងគេបន្ទាប់ពីរាជធានីភ្នំពេញ។
លោកនាយករដ្ឋមន្រ្តីក៏បានលើកឡើងថា រោងចក្រស៊ីម៉ង់ត៍ មានសមត្ថភាពផលិត ប្រមាណ២លានតោន ក្នុងមួយឆ្នាំ នឹងបើកដំណើរការនាពេលខាងមុខ ក្នុងខេត្តកំពង់ស្ពឺ ដែលនឹងធ្វើឱ្យខេត្តនេះ ក្លាយជាខេត្តផ្គត់ផ្គង់ស៊ីម៉ង់ត៍មួយក្នុងប្រទេស។
រោងចក្រផលិតស៊ីម៉ង់ត៍ខាងលើនេះ វិនិយោគដោយ ក្រុមហ៊ុនមកពីប្រទេសចិន Conch KT Cement ដែលកំពុងវិនិយោគរោងចក្រផលិតស៊ីម៉ងត៍ ក្នុងខេត្តបាត់ដំបង ក្រោមទុនវិនិយោគប្រមាណ២៦៣ លានដុល្លារ។ នេះបើយោងតាមរដ្ឋបាលខេត្តកំពង់ស្ពឺ៕
ប្រែសម្រួលដោយ៖ សុ ជាតា
Related Posts
- January 10, 2023
- January 20, 2023
- December 19, 2022
- December 13, 2022
