ក្រុមប្រឹក្សាធម្មនុញ្ញកម្ពុជា (CCC) បានប្រកាសពីធម្មនុញ្ញភាពនៃច្បាប់ស្តីពីវិសោធនកម្មច្បាប់បោះឆ្នោត។

សេចក្តីប្រកាសព័ត៌មានរបស់ក្រុមប្រឹក្សាធម្មនុញ្ញ បានឱ្យដឹងថា កិច្ចប្រជុំពេញអង្គរបស់ខ្លួន ដើម្បីពិនិត្យធម្មនុញ្ញភាពនៃច្បាប់ធ្វើឡើងនៅព្រឹកនេះ ក្រោមអធិបតីភាពលោក អ៊ឹម ឈុនលឹម ប្រធានក្រុមប្រឹក្សាធម្មនុញ្ញ។

ច្បាប់នេះត្រូវបានរដ្ឋសភាអនុម័តកាលពីថ្ងៃទី២៣ ខែមិថុនា ឆ្នាំ២០២៣ ក្នុងសម័យប្រជុំលើកទី៩ នីតិកាលទី៦ និងព្រឹទ្ធសភាក្នុងសម័យប្រជុំលើកទី១០ នីតិកាលទី៤ នៅថ្ងៃទី២៩ ខែមិថុនា ឆ្នាំ២០២៣។

ច្បាប់ចំនួនប្រាំបីមាត្រានេះមានគោលបំណងធ្វើកំណែទម្រង់ “សិទ្ធិឈរឈ្មោះសម្រាប់ការបោះឆ្នោត” ដើម្បីបង្កើនតម្លៃនៃលទ្ធិប្រជាធិបតេយ្យសេរីពហុបក្សដែលមានចែងក្នុងរដ្ឋធម្មនុញ្ញនៃប្រទេសកម្ពុជា ក៏ដូចជាលើកកម្ពស់គណនេយ្យភាពរបស់មេដឹកនាំនយោបាយជាប់ឆ្នោតនៅថ្នាក់ជាតិ និងថ្នាក់ក្រោមជាតិ។ AKP-C.Nika